Hemi puala inkhawm Chanamari YMA Hall-a neih hi Sports & Youth Services Director Pu Zothanmawia’n a kaihruai a, Sports Minister Pu Robert Romawia Royte chuan, Jeremy Lalrinnunga leh Lalremsiami te hlawhtlinna chuan sorkar a ti phur hle a ni, a ti a. Ramchhung leh khawvel hriata Mizote pho lan tu an ni tih sawiin, sorkarin infiammi hlawltlingte chawimawina pawisa a pek turah sum bituk a awm lo a, Finance Department an biakrawn hnuah, Chief Minister Pu Zoramthanga remtih angin cheng nuai 35 ruahman a ni tih a sawi. Pu Robert Romawia Royte chuan, Jeremy Lalrinnunga leh Lalremsiami te hlawhtlinna chu Mizote tan meichher chhitu a ni, a ti a, an mahni ang bawk hian an mahni chherchhuaktu Coach te pawh chawimawi an phu hle a ni, a ti.
Sports Secretary Pu H Lalengmawia chuan, miropui leh thleng sang te hian an hlawhtlinpui chu inrintawkna, tumruhna leh a engzawnga thilthlir thin a nih thu a sawi a, infiammi te chu an tum hlena thleng thei turin heng thil hi an neih a ngai tih a sawi. Lawmpuina pawisa hi Lalremsiami hnenah cheng nuai 20 leh Jeremy Lalrinnunga hnenah cheng nuai 15 pek a ni a. Hei bakah hian Tourism Department-in kum khat chhung Brand Ambassador atan cheng nuai 3 in Contract an ziahpui bawk. Jeremy Lalrinnunga leh Lalremsiami hi training lai an neih avanga phai lama an awm avangin an nu leh pa te ve ve in he chawimawina hi an dawn sak a ni.
