Nizan khan Central YMA hnuaia ruihhlo dotu pawl SRS te chuan Bawngkawn Sairang road-ah, Heroin No.4 Hawng 11 leh a neitu a puh an man. SRS te hian an thudawn bawhzuiin nizan khan Zokhawthar atanga rawn ken thlak, Heroin No. 4 hawng 11 leh a neitu a puh Thankhuma kum 46 Zokhawthar, Champhai District nia in chhal chu an man a. Thankhuma hian No. 4 hi hmarcharo kara thukruin a rawn kengthla a ni. SRS te hian Thankhuma leh a ruihhlo kawl lai hi an manna hmunah hian Excise & Narcotics Department te kutah an hlan nghal a. Excise & Narcotics Department hian Thankhuma hi thubuai an siamsak nghal a. Heroin No.4 Hawng 11 hi Rs. 495,000 man vela chhut a ni.
