State pawna tangkhang hlawm lian thama lo thleng hmasa ber tur, Tamil Nadu leh Pondicherry atanga Rel-a lo chhuakte chuan naktuk hian Bairabi an lo thleng tawh dawn.

0
33
views

Rel-a lo thleng tur te hi a tirah mi 974 ni tura beisei an nih laiin, rel a rawn chuang tak hi mi 866 nia hriat an ni. Heng mite lo dawnsawn dan tur leh an awmna District hrang hranga thlah zui dan tur relin Kolasib District bawrhsap Dr. H. Lalthlangliana hovin vawiin khan District tin atanga ruat, Liason Officer te Kolasib ah an thukhawm a ni.

District hrang hranga mi te, an awmna District theuha phurh thlenna tur hian Bus hi 52 ruahman a ni a, Aizawl District tan Bus 21, Champhai District tan Bus 5, Hnahthial District leh Khawzawl District tan 1 ve ve, Kolasib, Lawngtlai leh Lunglei District tan Bus 3 theuh, Mamit District tan Bus 5, Saitual District leh Serchhip District tan Bus 2 leh Saiha District tan Bus 7 ruahman a ni.

Bairabi-ah hian an hriselna dinhmun enfiahna tur screening point hmun 10-ah siam a ni a. District tin Liaison Officer te hian an District chan theuha mikhual lo thlengte hi Medical Screening tih zawh atangin an buaipui nghal dawn a ni.

Rel-a lo haw mekten Bairabi an lo thlen tawh dawn avang hian Kolasib District Magistrate chuan naktuk zing dar 9 atanga tlai dar 4 thlengin Bairabi leh Saihapui peng Zero Point inkarah mihring leh lirthei eng chi pawh kal a khap a, tangkhang lo haw turte hi sorkarin anmahni district awmna thleng a thlah vek dawn avangin mahni chhungte private motora inlam leh inhmuah a khap bawk a ni.

Ram pawna tangkhang mi 900 dawn Rel hmanga Bairabi-a lo thleng turte hi Chennai Mizo Welfare Association-in an buaipui a, Chennai khaw pawn district 21 atangin Tamil Nadu sawrkarin pawisa a tum sak hmangin mi 308 vel chu Chennai ah hruai thlen an ni a. Rail chuan man hi Tamil Nadu sawrkarin a tum sak vek bawk a ni. Chennai Mizo Welfare Association-a an president Pu R Lalvena IAS leh a thawhpuite an thawkrim hle a ni.