Mizorama tuialhthei leh boruak alh thei zawn mekah Thenzawlah lei verh tan thuai a nih tur thu, OIL India Limited Chief Manager, Pu Rupjyoti Phukan-a’n vawiin khan Aijal Club-ah thuthar thuthar lakhawmtute a hrilh a, Maubuang leh Keifanga lei an verh tawhnaah hlawhchham lo mah se, an beisei ang an la hmu rih lo tih sawiin, Keifangah hian beiseina sang tak an nei a, lei verh tan hmaa satellite atanga an zir chiannaah pawh boruak alh thei emaw tuialhthei emaw a awm ngei beisei a ni tih a sawi. Pu Rupjyoti Phukan chuan, Thenzawla lei verh tur hian an inpeih fel thawkhat tawh tih sawiin, a hmun hma pawh buatsaih fel vek tawh niin a sawi a, hna thawh tan thuai a nih tur thu a sawi. Mizoram hi state dang nen a leilung awm dan a inan loh avangin hnathawh chak a harsa niin OIL India Limited hotute chuan an sawi a, hmun danga ni khata lei an verh theih zat chu Mizoramah chuan thla khat deuhthaw verh a angai nia sawiin, hmanraw tha leh changtlung zawk ngaihtuah zel a nih tur thu an sawi. Mizorama hna an thawh mekah sorkar thlawpna leh pawl hrang hrang tawiawmna tha tak an hmu nia sawiin, an thil tih hi a hlawhtlin chuan Mizoram tan hlawkna nasa tak a nih dawn avangin mipuite thlawpna an dawn chhunzawm zel an beisei thu pawh OIL India Limited hotute chuan an sawi bawk.
OIL India Limited hotute chuan, Sorkar laipuia Parliamentary Affairs Ministry leh Petroleum and Natural Gas Ministry hnuaia OIL India Limited tangkawp-in tun thla ni 12 leh 13 chhung hian Aizawl Kulikawn YMA Hall-ah ‘India thar kan siam ngei ang’ tih thupui hmangin Exhibition buatsaih a nih tur thu pawh an sawi a ni.
