Tlabung khaw pum huapa thlawhma siama eizawngte intel khawmna, Zodin Farming Cooperative Society hruaitute chuan, Dinthar-ah hian vaimim chinga thlawhma siam chhungkaw 55 -te chuan, thlai ei chhetu pangagang chi khat Fall Army Worm vangin harsatna an tawk nasa hman hle tih an sawi a, department nen tangkawpa a thahna damdawi nen an do let hnu-ah, kuthnathawktute dinhmun tlemin a ziaawm chho deuh tih an sawi a, harsatna lian tham zawk pumpelh thei dinhmunah an ding tawh ni an hriat thu an sawi.
Kum 2018 leh 2019-a Tripura atanga hruai kir Bru chhungkuate inbenbelna, Dinthara kawlphetha pek a la nih loh avanga buh leh thlai chinna hmun siama eizawngte harsatna tawh thin pawh vawiina helai hmun tlawhtute hian an enpui a, Zodin Farming Cooperative lam ngenna bawhzuiin Power & Electricity department-a thawkten eng pek dawna thil tih fel hmasak ngaite an zir chiang nghal a ni.
Dinthar-ah hian tun dinhmunah Bru chhungkua 65 an awm a, an zinga chhungkaw 55-te chuan SEDP hnuaiah vaimim chinna hmun siamin thlawhhma an enkawl mek a ni.
