Mizoram sorkar a\anga thudawn danin Tripura Bru Relief Camp-a Mizoram mi awm te hi Mamit District-a khaw 48-ah te, Kolasib District-a khaw 10-ah te leh Lunglei District-a khaw 4-ah te dah an ni dawn a, a bul \an nan District hrang hranga laklet tur kum 2016 November thlaa chhinchhiah fel tawh te chu zawn chhuaha an awmna tur khua \heuhah hruai haw an ni ang a, chenna in tur sak sa a awm loh avangin an chen lailawkna in tur sorkarin a sak sakah dah phawt an ni ang a, hemi hnu hian anmahni dahna khaw hrang hranga VC ten in sakna tur ram an pekah anmahniin an duh angin in an sa dawn a ni.
Hetiang bawk hian Kolasib District mite tan an letna tura khaw 10 thlanchhuahah hruaia an chen lailawkna tur in sak sakah dah an ni ang a, Lunglei District-ah pawh an letna tur khaw 4-ah an chen lailawkna tur in sakah dah an ni ang.
Tripura Camp 6-a Mizoram mi awmte laklet dan tur kimchang hi Mamit, Kolasib leh Lunglei District-ah te anmahni awptu Bawrhsap kaihhruaiin siamfel vek a ni tawh a, anmahni dahna tur khuaah te hian in an sakna tur ram pek dan tur leh ram chhunga cheng midangte anga leilung tlawh chhana ei an zawn dan tur pawh ruahman fel a ni tawh a ni. Puan tawh angin Tripura Bru Camp 6 a\anga Mizorama lo let tur chhinchhiah tawh zat chu chhungkaw 5,413-a mi 32,857 an ni a, an zingah hian naupang 9,577 an awm a, a bak zawng 23,280 te chu puitling an ni.
He ruahmanna siam hi tun thla ni 3-a Union Home Ministry kaihhruaia New Delhi-a inremna thuthlung siam tak hlenchhuahna tura hmalakna tur a ni a, inremna thuthlungah khan sorkar laipui aiawhin Home Ministry-a Special Secretary, Internal Security, Pi Rina Mitra leh Mizoram Bru Displaced People’s Forum President, Pu A. Sawibunga te bakah Mizoram sorkar aiawhin Principal Secretary, Home Pu Lalnunmawia Chuaungo leh Tripura sorkar aiawhin Chief Secretary, Pu Sanjeev Ranjan ten an hming an ziak a, hei hi Union Home Minister, Pu Rajnath Singh, Mizoram Chief Minister, Pu Lal Thanhawla leh Tripura Chief Minister, Pu Biplab Kumar Deb ten an hriatpui a ni.
