Sorkar laipui leh Mizoram sorkar ruahman anga Tripura Bru Relief Camp atanga thla leh, March thla atanga Mizorama lo let duh te zawhfiah hna vawiin atang khan Camp pahnihah thawh tan a ni. ZONET zawhna chhangin Home Deptt.-a Additional Secretary, Pu Lalbiakzama chuan he hna hi vawiin khan Kaskau Camp-ah leh Khakchangpara Camp-ah an tan niin a sawi a, Mizoram atanga Tripura Bru Relief Camp-a kal te hi Additional Home Secretary, Pu Lalbiakzama bakah Lunglei Bawrhsap, Pi Lalzarmawii, Mamit Bawrhsap, Pi Lalbiaksangi, Kolasib Bawrhsap, Pu R. Zarzosanga, SP te, Central YMA, Assistant Secretary, Pu Peter Chhakchhuak, Mamit Sub Hqrs. YMA President, Pu Zatluanga Sailo leh Lunglei, Mamit leh Kolasib DC Office-a Officer te an ni a, an sawm angin Bru Refugee Camp-a awm thin, Mamit District-a let tawh te pawh an mite thlem turin an kal tel ve a, Mizoram atanga kal zawng zawng hi an vaiin mi 61 an ni. Union Home Ministry atangin Adviser, Pu Mahesh Kumar Singla pawh a tel a, North Tripura District Hqrs. Dharma Nagar atangin Bawrhsap, Pu Sharabindhu Choudhury leh Officer dang an tel a, Mizoram Bru Displaced People Forum hruaitute pawh an tel a ni. Kaskau-a inkhawm an neihah Mizoram sorkar aiawhte chuan Relief Camp-a awm Mizoram mi dik tak enfiah tawh zinga Mizorama let duh te chu an Camp-a kal Mizoram sorkar Officer te hriattir turin an hrilh a, hemi rual hian an awmna hmun tur ruahman te, Mizorama an kir leh huna tanpuina leh enkawlna an dawn tur te an hrilhfiah nghal a ni. Hetiang bawk hian vawiin khan Khakchangpara Camp-ah pawh Mizoram mi dik tak te laklet dan tur ruahmanna siam sawifiahin a let duh tur te hming lakhawmtu tur sorkar officer an hnutchhiah a ni. Hetiang hian Bru Relief Camp 4 dangah pawh naktuk lamah tih zui a ni dawn a ni. Hetianga hmalak a nihna chhan hi Mizorama kir duh tak tak te dik leh felfai taka lak kir theihna tur niin sorkar hotute chuan an sawi a ni.
