Tu tih hriat lohten Bawngkawn Brigade rama an chenna in an thiah sak, Pu Lalhmingliana-te chhungkua Govt. J. Thankima College-in an chenna tur ngaihtuah sak

0
899
views

Tunkar Thawhlehnia tu tih hriat lohten Bawngkawn Brigade rama an chenna In an thiah sak, Pu Lalhmingliana-te chhungkua chu Govt. J. Thankima College-in an chenna tur a ngaihtuah sak. Pu Lalhmingliana-te in thiah a nih chungchang hi nimin khan Govt. J. Thankima College Staff Welfare Association, Bawngkawn Local Council, YMA leh Students’ Union Action Committee-in a ngaihtuah a, Govt. J. Thankima College ram Block III huam chhunga Students’ Union Office chu Pu Lalhmingliana-te chen lailawk nan hman tir an rem ti a ni. Govt. J. Thankima College Staff Welfare Association hruaitute chuan, Pu Lalhmingliana-te chhungkua hi chenna tur an pekah hian nizan khan an insuan lut nghal tih Zonet an hrilh a, tuna an chen lailawknaah hian eng chena rei nge an chen theih dawn tih sawi lawk theih a ni lova, hmalak zel dan tur chu College Principal hovin Bawngkawn Local Council leh YMA-in a la ngaihtuah dawn tih an sawi. College Staff Welfare Association hruaitute chuan, tuna Pu Lalhmingliana-te chennaah hian Electric Connection a luh loh avangin vawiin khan hmun remchang atanga eng pek nghal an ni tih an sawi a, Pu Lalhmingliana fate 3 chu lehkha zir lo an nih avangin lehkha an zir theih nana hmalakpui an tum thu an sawi bawk.

Puan tawh angin, Bawngkawn Brigade rama Govt. J. Thankima College leh Pi B. Lalhmangaihi ram inchuh laia cheng Pu Lalhmingliana-te chhungkaw luah lai in chu Thawhlehni chawhma dar 11:40 vel khan a luahtute awm loh laiin mi thenkhatin an thiat a, he thil thleng chungchangah hian ram neitu, Pi B. Lalhmangaihi chuan Bawngkawn Police Station-ah FIR a thehlut a ni.