Mizoram Peoples Party (MPP) chu tangrual pawl tia hriat ZPM-ah an inchhung lut. He thu hi ZPM Steering Committee Chairman, Pu Lalliansawta’n vawiin khan Aizawl Press Club-ah a puang a, kumina Assembly inthlanpui neih turah pawl hrang hrangin sorkar siam turin tan an la hlawm a, ZPM pawhin Mizoramah Sorkar tha a lo pian ngei theih nana tan a lakna kal zelah Mizoram Peoples Party (MPP) chu tangrual pawl anga an thawh honaah an tel ve ta tih a puang a ni.
MPP President, Pu C. Laltanpuia pawhin, an Party chu tum mumal tak nei a din a nih thu sawiin, thawh hona huangah hian mipui beiseina vanga tel ve ta an nih thu a sawi a. ZPM chu ram leh mipui tana chhenfakawm a nih ngei theih nan theihtawp an chhuah tur thu leh an pawl inrelbawlnaah a hranpaa rawtna neih ve an tum loh thu sawiin, MLA Candidate leh Chief Minister tur thlan chungchangah pawh Val Upa Council-in tha tura a ruat apiang an pawm dawn tih a sawi. ZPM puipate zinga mi, Dr. Kenneth Chawngliana chuan Mizoram Congress leh MNF-in ro an inrel chhawk a, hetianga duhthlan tur dang awm lo ang maia kal chu tha an tih loh avang leh Sorkar kalphung thar siam tura ZPM chu din a nih thu sawiin, he thawh honaah hian pawl 6 an tel tawh tih a sawi a ni. Dr. Kenneth Chawngliana chuan tuna he party-a awmsate bakah hian pawl dang 2, Prism leh Zoramthar pawl nen an inbe mek a, hei hi a kaltluang a nih chuan thawh honaah an tel ve thuai an beisei tih a sawi. Puan tawh angin, tangrual pawl, Zoram Peoples Movement hian nikum October ni 3 khan an pawl hruaitute puan chhuahna leh hruaitu hlanna an nei a, he pawl hi Mizoram siamthat duhtu zawng zawng tel theihna tura tih niin, tunah hian pawl 6 – ZNP, MPC, Zoram Exodus Movement ( ZEM), Zoram Democratic Front (ZDF), Zoram Reformation Front (ZRF) leh Mizoram Peoples Party (MPP)-te an tel ta a ni.
—————
Tangrual pawl, ZPM-a an inchhunluh thu vawiina an puan hnuah Mizoram Peoples Party (MPP) chuan thuchhuah siamin, Mizoram hmun hrang hranga an Party atanga ram siamthat duhtu zawng zawng chu ZPM hmalakna thlawp vek turin an ngen a. Veng leh khaw hrang hranga MPP Unit din tumte pawh MPP ni lova, ZPM Steering Committee hmalakna tawiawm tur leh thawh hona thuthlung zawm vek turin an hriattir a ni.
