Tuipui D lei chu rit phur motor zawh phal a nih loh vangin harsatna thleng

0
444
views

August ni 23 atang khan Lunglei District-a Tuipui D lei chu rit phur motor zawh phal a nih loh avangin, Tuipui rala khuaten harsatna an tawk nia thu dawn a ni a, Hnahthiala thu thar la khawmtute hnen atanga Zonet thu dawn danin, cheng nuai 311 chuang senga dawh, Mizorama Jeepable Suspension bridge sei ber, Tuipui ‘D’ lei hi hawn a nih atanga thla 6 naah a chhuat thenkhat chu thlak a ngai nghal a, August ni 23 atang khan rit phur motor tan zawh phal a ni ta lo a, PWD hotute chuan he harsatna hian eng chen nge a awh dawn an la sawi thei lo a ni. Metre 200-a sei, Tuipui ‘D’ lei khar chungchangah hian Lunglei PWD hotute chuan, lei hi a tir aiin danglam deuh leh che deuha an hriat thu an sawi a, Contractor leh a design-tu ni bawk, S.Guha Niyogi chu phone leh lehkha-in an hriattir tawh nia sawiin, Contractor hian an rawn endik tur thu leh, chumi hma chuan ritphur motor zawhtir tawh lo tura a rawn hrilh angin rit phur motor zawh phal a ni ta lo niin an sawi. Inremnaa tarlan angin, lei hi dawh zawh a nih atanga kum khat chhunga thil dik lo a awm chuan a siam that chu contractor mawhphurhna niin PWD hotute chuan an sawi a ni.

 

South Vanlaiphai Group YMA hruaitute chuan rit phur motorin Tuipui ‘D’ lei a zawh theih loh avang hian harsatna an tawk nasa hle tih an sawi a. Zin veivakten lei bula an bungruate hlang thla a, hlawhfa laa lei tawp thlenga thiar kai a, motor-a hlan leh a ngai tih an sawi a, tunah phei chuan tui a len avangin Marboat a hman theih loh avangin a buaithlak zual hle niin an sawi. Zonet thu dawn danin, Tuipui ‘D’ lei hi ni tin, maxicab 10 velin a zawh a, an bungraw phurh chu a rit emaw, rit lo emaw, motor-a phurh kai phal a nih loh avangin lei bulah hlan thlaktir vek an ni a, bungraw neituten an bungruate chu leiah hian ke-in an thiar kai a, thenkhat chuan hlawhfa an la a ni. Tuipui ‘D’ hi Kolkata-a S.Guha Niyogi & Associates Engineers & Contractors-in kum 2012 November thla khan a dawh a, kum 2016 November ni 19 khan hawn a ni a. He lei dawh a nih lai, kum 2014, December ni 13 khan lei khaitu a hruipui chu chatin a chim a, mi pakhatin a thih phah tawh a ni.