Kum 2009-a Serkhan leh Bagha inkar kawngpui siamna sum tichingpen chungchang Court-in ngaihtuah mek

0
363
views

Kum 2009-a Serkhan leh Bagha inkar kawngpui siamna sum tichingpena puh mi 3 – PWD Engineer-in-Chief hlui, Pu Liansanga, Chief Engineer hlui, Pu Lianchungnunga leh PWD E-in-C office-a Budget cell Accountant, Pu B. Lalthanpuia thubuai chu Court-in a ngaihtuah mek. Sorkar ukil hnen atanga Zonet thu dawn danin, helai kawngpui siamnaa sum hman dan hi felhlela ngaiin kum 2009, November ni 3 khan khatih laia Hmarphei Zirlai Pawl President, B. Vanlaltana’n ACB-ah thubuai a thehlut a . Hei hi a chhui hnuah ACB chuan chhui zui zel tlakah ngaiin, tun hnai khan charge sheet chu Court-ah a thehlut a ni. Heng mi 3-te thubuai hi Special Court (Prevention of Corrution Act)-in a ngaihtuah mek a, thil tisuala puhte hi thu zawhfiah tawh an nih bakah, thuhretu mi 56 pawh Court-in thu a zawtfiah mek a, vawiin thleng khan mi 18 thu a zawtfiah tawh a ni.

ACB-in a chhuina atangin kum 2004-09 chhung khan Serkhan leh Bagha inkar kawngpui siam nan PWD-in cheng nuai 696.10 a dawng a, he sum atang hian khatih laia PWD Engineer-in-Chief hlui, Pu Liansanga chuan PWD Kolasib Division EE hnenah cheng nuai 435.29 a pe chhuak a, a bak, cheng nuai 260.81 chu hmun danga pawh pèn nia hriat a ni a. Khatih laia Chief Engineer, Pu Lianchungnunga pawhin he kawngpui siamna tur sum cheng nuai 107 chu a lapse niin ACB a hrilh a, Accountant General Report-ah he sum hi lapse a awm lo tih tarlan a nih si avangin rinhlelhawma ngaih a ni a. Accountant, Pu B. Lalthanpuia chu heng mi 2-te thurualpuia, lehkha lem siamah puh a ni bawk.