Tuirini lei dawh lai Chalfilh bialtu MLA-in a hmunah tlawh

0
355
views

Sesawng leh Khawruhlian inkara Tuirini lei dawh lai tun thla ni 13 zinga chim chu nimin khan Chalhfilh bialtu MLA Dr. Ngurdinglianan a hmunah a tlawh. MLA hi National Highway Division II Executive Engineer Pu Lalhmingmawia leh a thawhpuiten an lo dawngsawnga, Pu Ngurdingliana chuan, a zin bo hlana he lei chim leh Sesawng khaw mi Pu HC Lalfakzuala a thi leh Laltleipuia Hmar in hliam a tuar chu pawi a tih thu sawiin tanpuina leh zangna dawmna awm thei ang ang ngaihtuahpui a tum thu a sawi bawk. Dr. Ngurdingliana chuan he lei chim vanga Darlawn tlangdung khaw tam tak tan harsatna a thleng chu pawi a tih thu sawiin Sawrkarin lei dawh leh thuai dan tur a ngaihtuah mek tih a sawi bawk. Chhiatna rapthlak tak thlen laia Politics-a hamthatna lak tuma mi thenkhat thil ti an awm ni a sawiin pawi a tih thu a sawi bawk. He tih lai hian ZONET zawhna chhangin PWD Minister Pu Lal Thanzara chuan, Tuirini lei dawh lai chim ta bulah hian kumin fur ruahtui tlak nasat hma a zawhfel hman tum turin lei thar dawh thuai tum a ni tih a sawi a, hetihlai hian Mizoram sorkar hnuaia Finance Dept. chuan lei dawh thatna tur cheng nuai 210 nimin khan a sanction tawh a ni.