Union Minister for Drinking Water and Sanitation Minister Pu Ramesh Chandappa Jigajinagi-a’n BJP pisa tlawh

0
618
views

Sorkar laipuia Drinking Water and Sanitation Minister Pu Ramesh Chandappa Jigajinagi zankhat riaka nimin a Mizoram rawn tlawha lo zin chuan vawiin khan Mizoram Pradesh BJP pisa a tlawh. A puala inkhawm tawi buatsaihah Pu Ramesh Chandappa Jigajinagi chuan, khawpui leh thingtlanga cheng te tui thianghlim pek chu Prime Minister Narendra Modi an Swach Bharat Mission a kalpui zingah a tel avangin a tihhlawhtlin kawngah State sorkar leh thawktuten nasa takin mawh an phur a, dik taka thil an kalpui a tul avangin BJP party mite pawhin thil dik lo awm thei lakah sorkar an venpui a ngai a ni a ti a, thil fel tawk lo a awm anih chuan a hnena thlen thuai thin turin a chah bawk. Pu Ramesh Chandappa Jigajinagi chuan, zirna in zawng zawngah hmeichhia leh mipa inthiarna a hrangin a awm vek tur a ni tih a sawi a, hei bakah tuithianghlim hman tur hnianghnar tak mipuiten an dawn a tul thu pawh sawiin kum 2022 ah India chu ram fai, Clean India ni tawh tura hmalak a ni a ti a, hemi atan Sorkar tha siam ngei turin Mizoram BJP te duhsakna a hlan bawk.

Niminpiaha Mizoram rawn tlawhtu Sorkar laipuia Health & Family Welfare Minister Pu Jagat Prakash Naddha pawhin BJP pisa hi a lo tlawh tawh a, BJP Mizoram Pradesh hian Mizoram sorkarin Falkawna State Medical College din a tum chu Central Medical College zawk din anih theih nana hmalakpui tura ngenna Memorandum an lo thehlut a, Minister chuan, a theih ang anga hmalakpui a tum thu hrilhin, Prime Minister hnenah pawh ngenna thlen turin thurawn a pe a ni. BJP Mizoram Pradesh in BJP leh Christianity tih lehkhabu an buatsaih chu Minister hian a tlangzarh nghal a ni.