Vawiin hi Mizoram State Day champha vawi 31-na a ni a, kum 1987, vawiin ang khan Mizoram Union Territory chu State puitlingah hlankai a ni a, hemi ni hian Lammuala mipui tam tak pungkhawm hmaah thusawiin khatih laia Prime Minister, Pu Rajiv Gandhi chuan Mizoram State thar a hawng a ni. Hawnna inkhawmah hian Mizoram State thara hlankaina atana sorkar laipui thu chhuah chu khatihlaia Mizoram Chief Secretary, Pu Lalkhama’n a chhiarchhuak a, Mizoram State tharah hian UT a nih laia Lt. Governor ni thin, Pu Hiteshwar Saikia chu Governor thar atan dah nghal a ni. Mizoram State-a hlankai hma, kum 1986, June ni 30 khan MNF hel pawl hruaitu, Pu Laldenga leh Central sorkar aiawhte chuan remna thuthlung an siam a, hetah hian sorkar laipui aiawhin khatihlaia Union Home Secretary hna chelhtu, Pu RD Pradhan leh Mizoram Chief Secretary, Pu Lalkhama te chuan an hming an ziak a ni. Hei hian kum 20 chhung zet rambuai lo ni tawh, Mizoram chu UT atangin State puitlinga a hlankai bakah remna leh muanna awmna ram atan a siam ta a, MNF mi rammu zawng zawngte chu a bo a bang awm lovin an ralthuam nen nunphung pangngaiah an lo let a ni. Mizoram State puitlinga hlankai a nih theihna tur hian kum 1986, Augut ni 5 khan Parliament chuan Mizoram State Bill a pass a ni. Mizoram State Champha vawiina lo thlengah Prime Minister, Pu Narendra Modi chuan Mizo mipuite duhsakna a hlan a, a thu thawnah Prime Minister chuan Mizoramin tluang taka hmasawnna kawng a zawh zel theih a duh thu a sawi bawk a ni. Vawiin Mizoram State Day Champha vawi 31-na lo thleng kha sorkar lam atangin lawm a ni lova, sorkar pisa chawlhniah erawh chuan puan a ni a, hei hi remchanga la-in veng thenkhat chuan khawtlang tana thil tha tih nan an hmang a, Khatla Branch YMA chuan an veng chhunga kawngpui leh hmun hrang hrang thenfai nan an hmang a ni.
Mizoram State Day pualin, Home Minister Pu R Lalzirliana’n Mizoram mipuite chu Pathian hriatna nen thuawi taka awm a, inlak hranna rilru pu lo turin a chah.
