Vawiina lehlanga Congress tana campaign beihpui Mizorama thlaktu Congress President Pu Rahul Gandhi a’n Champhai Kahrawt Field-a vantlang inkhawmah thu a sawi a, State hrang hrangah an State chhunga Political Party ten RSS leh BJP te chu an State chhunga an luh theih nan kawngka an hawn sak \hin a, Mizoramah pawh BJP leh RSS lo luh theih nan MNF-in kawng a hawn sak niin a sawi a, hetihlaia Congress party miten BJP leh RSS thil tum dodala an State venhim hna an thawk chu a lawmawm hle niin a sawi.

0
263
views

 

Pu Rahul Gandhi chuan India ram pum huap pawhin duhdan inanglo vanga indona a awm reng a, chutah chuan RSS leh BJP \angkawp chuan duhdan pakhat an neih chu midangte zawm luih tira India mite hnam nun chi hrang hrang, \awng hrang hrang leh ngaihdan hrang hrangte nuaibo vek a tum a, hetihlai hian Congress ve thung chuan India ramah ram mipuiten ro an rel ang a, chutah chuan ngaihdan chi hrang hrang, \awng chi hrang hrang, hnam nun ziarang chi hrang hrang neite chuan an duhdan an tarlang thei tur a ni tih chu a ngaihdan a ni a ti a, BJP leh RSS thil tihdan chu mi chi hrang hrang leh hnam chi hrang hrangte \hendarhna leh indo tir tumna niin a sawi a ni. Congress President chuan amah chu Delhi-a awma, anmahni tana hnathawktu a ni tih hre reng turin mipuite a chah a, Prime Minister, Narendra Modi angin thil tiam lian pui pui neih a duh loh thu te, thudik lo sawi a duh loh thu te a sawi a, Congress chuan Mizoram hi hmarchhak biala hmun pawimawhah siam a duh niin a sawi a, Mizoram chu motor intlansiakna hmunpui atan siam tum niin a sawi bawk. Mizorama Congress sorkar hmalakna chu fakin Youth Commission-in UPSC hnuaia exam chi hrang hranga tling thei tura zirlaite a buatsaihna te, Falkawna Medical College din te, Thenzawl Horticulture College din te leh kuthnathawktute dawmkang tura kawng hrang hranga hmalakna te a fak bawk a ni. Pu Rahul Gandhi chuan sorkar laipuiin ram venhimna atana France a\anga Rafale indo thlawhna a lei danah Prime Minister, Narendra Modi chuan thil dik lo nasa tak a ti niin a sawi a, he indawrnaa an mi chhawr Anil Ambani hnenah cheng vbc 30,000 pe-ah a puh a ni.

He inkhawma thusawitu dang MPCC President, Pu Lal Thanhawla, Champhai South biala Congress candidate ni bawk chuan Mizoram chu India rama economy \han chakna ber State niin a sawi a, Mizorama mimal tin sum thawh chhuah chu India ram puma mimal tin thawhchhuah aiin zaa 20 velin a tam zawk niin a sawi a, hei hi NLUP vang a ni tih sawiin, mi retheiten leirem an rah theihna tur leh ram hmasawnna thlen theihna turin Congress thlangtling nawn leh turin mipuite a sawm a ni.

He inkhawm hi MPF Champhai Forum Chairman, Rev, R. Lalngaihthanga’n a kaihhruai a, hetah hian Champhai North biala Congress candidate Pu TT Zothansanga MLA leh East Tuipui biala Congress candidate, Pu T. Sangkunga MLA te pawh an tel a ni.