YMA General Conference neihna tur Pandal, Zotlang Field thara sak mek chu kar leh kar tawp lamah peih fel hman beisei a ni

0
344
views

Tun thla ni 17 leh ni 19 inkara Champhai Zotlanga YMA General Conference neihna tur Pandal, Zotlang Field thara sak mek chu kar leh kar tawp lamah peih fel hman beisei a ni. He Pandal hi a dung feet 190, a vang feet 160-a lian, mi sing khat leng tura sak a ni a, a sa tur hian cheng nuai 16-in Silchara firm pakhat, Chakeswari Tent House rawih an ni a, anni hian a ban leh beam atan anmahni hmanrua, mau rawn kengin an sa a, tunah hian a chung chanve aia tam chih tawh a ni a, a chung chih zawh tawh chinah YMA rawng a sen, a var leh a dum hmangin ceiling siam mek a ni a, Pathianniah an chawlh ve loh avangin naktukah chuan a chung an chih zawh theih beisei a ni. Hruaitute \hutna tur dawhsan, feet 100-a sei, feet 35-a zau pawh dawh zawh \ep a ni tawh a, Pandal sir vela Counter hrang hrang te, inthiarna tur, zun in leh ek inte peih fel a ni tawh a, a chhunga \hutna tur pawh leirawhchan rem chunga thingzai dawh hmangin siam zawh a ni tawh bawk. Pandal satute bakah hian hnatlang neih \hin a ni a, engkim a hun taka peih fel beisei a ni a, kar leh Zirtawpni zanah chuan Pathian hnena hlanna buatsaih theih tum a ni.

Puan tawh angin YMA General Conference Programme hi Central Coordination Committee \hukhawm chuan a duang fel tawh a, Central YMA hotute hnen a\anga thu dawn danin, kumpuan atana rawtna lut 3 – Ram leh hnam humhalh, Zirna uar tih leh Ruihhlo do tih chu Conference neih huna buk atan chhawp chhuah tum a ni a, YMA khawih Agenda atana rawtna lut 25 zingah 5 ngaihtuah tura pawm a ni a, chungte chu Mizo lengkhawm, khawhar hla thluk \hangtharten an hriat zui zel theih nan solfaa dah ni se tih te, hlo tur leh rannung thahna hlo, fimkhur taka hman a nih theih nan a \ul dan angin YMA-in hma la rawh se tih te, ruihhlo ngaite chhanchhuahna tur, Rehabilitation Centre \ha leh changtlung tak neih theih nan Central YMA-in hma la rawh se tih te, Mizoram chhunga awm Central leh State Institution hrang hrangah te Mizoten seat tam zawk an chan theih nan Central YMA-in hma la rawh se tih te leh Mizoram hmun hrang hranga inkalpawhna kawng awm te tun aia \haa siam a nih theih nan Central YMA-in hma la rawh se tih te a ni. Sorkar khawih Agenda sawiho tura pawmte chu thlaia intodelh zawk theih nan thingtlang a\anga thlai thar te khawpui chhunga zawrhna tur sorkarin ngaihtuah rawh se tih te, Mizoram leh Bangladesh inri-na ramri hi tun aia \haa ven a nih theih nan ramri BSF te hi Assam Rifles-a thlak a nih theih nan hma lak ni rawh se tih leh dan lo anga din Chakma Autonomous District Council hi dan anga \hiah a nih theih nan Central YMA-in hma la rawh se tih te a ni bawk. YMA General Conference-ah hian Khuallian atan Chief Minister, Pu Lal Thanhawla sawm a ni a, ani pawhin a pawm thu, YMA hruaitute a hrilh tawh a ni.