Zanin zanlai dar 12 atangin Mizoram pumah khauh zawka inkharkhipna kalpui a ni dawn a. Hei hian hapta hnih chhung a awh phawt ang.

0
145
views

Veng leh khua azirin inkaihhruaina siam a ni ang a, khawpui leh dist Hqrs-ah mipui kharkhipna khauh tak kalpui a ni ang a, mipuiten chakkhai an lam khawm dan tur ruahmanna siam a ni ang. Loh theih lohah chauh Home Quarantine kalpui a ni tawh ang a. Quarantine hun chhung chu ni 14 atangin 21 ah pawhsei a ni bawk.

Chief Minister Pu Zoramthanga kaihhruaiin vawiin khan sorkar mipawimawhte, IMA, MGDA, MKHC, VC leh Local Council hruaitute, NGO coordination hruaitute leh mimal damdawi In neitute Aizawlah an thukhawm a, mipui kharkhipna thupek khauh zawka kenkawh hi an rel a ni.

Thutkhawmna kaihruaitu Chief Minister Pu Zoramthanga chuan, hri leng laka himna turin inkharkharkhipna khauh zawka kalpui chu a duhdan a nih thu a sawi a, hei hian fimkhurhna a thlen dawn a ni a ti a, hetihlai hian veng, khua leh a hmun azirin inkaihhruaina chu siam a ni ang tih a sawi a, khawpuiah chuan khauh taka kalpui a tul tih a sawi.

Chief Minister hian, Home quarantine chu tul bik thil leh loh theih lohah lo chuan chhunzawm loh tur a nih thu a sawi a, sorkar leh community quarantine hmuna awmte chu ni 21 chhung awmtir an ni ang a, hemi hun chhung hian quarantine hmuna awmte dinhmun enfiah hman theih beisei a ni a ti.

Ram sum leh pai dinhmun ngaih pawimawh luat vanga covid 19 inkai tam tir a hlauhawm tih Chief Minister hian a sawi a, chawlhkar hnih chhung hrehawm tawrh leh chu nakina himna tur a nih a rin thu a sawi.

Chief Minister hian hri leng do nan sum neih ang ang hman a ni zel dawn tih a sawi a, Ambulance indaih lohna phuhrukna tur pawh ngaihtuah zel a ni ang a ti a, hri leng do let turin sorkar a inhuam reng a, Department-in an mamawh an dilte pawh pek zel an ni a ti.

February ni 3-a sum dilna hnawl sak thu chanchinbu-a lang chu Finance changtu, Chief Minister Pu Zoramthanga hian sawifiahin, he thil hi ‘covid-19 hriat pawh la hriat chian hma thil a ni’ a ti a, hri leng do let nan a tul anga sum hman zel a ni a ti.

Rapid Antibody Test, RAT sawiselna chungchangah Chief Minister hian, a tirah engmah an hriat lawk bik loh thu a sawi a, phaia tangkhang hruai haw hnuhnawh anga mithenkhatin an sawi pawh hri leng a darh hmain hruai haw duh mah se, anmahni hruai hawna turin lirthei chettir sorkar laipuiin a rem ti lo a, a theih velah tangkhang te hruai haw an ni a ti bawk.

Pawl 12 subject exam hmabak la nei te exam chungchang sawiin Pu Rama chuan, Department-in exam hun tura rawtna a neih te sorkarin ala pawmpui lo tih a sawi a, boruak a zirin kaltlangpui chi a ni dawn em tih sorkarin a enpui dawn tih a sawi.

IMA Vice President Dr. John Zohmingthanga chuan, kawng hrang hranga zirchianna an neih hnuah, khauh zawka inkharkhipna kalpui chu an duhdan a nih thu a sawi a, home quarantine a awm ten dan an zawm tha tawk lo nia an hriat thu te, sorkar leh Community Quarantine facility-a awm ten inkaihhruaina an zawm tha tawk lo tih an zirchianna atanga an hmuh thu te a sawi a, khauh zawka inkharkhip an duh chhan chu vantlanga inkaidarh, community spread a thlen lohna tur a nih bakah hemi chhung hian quarantine center a awm te leh Chennai atanga rawn haw, quarantine hun hmang zo tawh te chhui chhuah a awlsamna tur a ni a ti.

Vawiin thutkhawmnaah hian pawl hrang hrang aiawhte hian hri leng laka himna turin mipui khuahkhirhna khauh zawka kalpui an duh thu an sawi vek a ni.