ZNP-in Citizenship (Amendment) Bill, 2016 an duhloh thu JPC Chairman hnenah thlen

0
407
views

ZNP-in Citizenship (Amendment) Bill, 2016 chu an duh loh thu, Joint Parliamentary Committee Chairman, Pu Satyapal Singh hnenah ziakin an thlen a. Vawiina Fax hmanga lehkha an thawnah ZNP chuan, nikum July ni 19-a Lok Sabha-a Citizenship (Amendment) Bill, 2016 put luh a nih hnuah nikum vek, August ni 11 khan he Bill hi Joint Parliamentary Committee kutah hlan chhawn a ni a. He Bill chungchanga pawl leh mimal tana an rawtna thehluh theih hun, JPC-in a hawn chu a rei lo hle nia sawiin, he Bill hi pass a nih chuan Mizoram bakah Hmarchhak bial state hrang hrangin sakhua leh mipui nunphungah harsatna an tawh theih dawn avangin ngaihdan thlen theihna leh ngaihtuahna hun rei deuh zawk pe thei se an duh thu an sawi a ni. ZNP chuan, Citizenship Act, 1955-in a sawi angin, danin a phut lehkha pawimawh nei lova ram dang atanga lo lut leh chengte chu India khua leh tui an ni lo tih a ni a. Citizenship (Amendment) Bill, 2016 hi pawm a nih chuan, Afghanistan, Bangladesh leh Pakistan atanga dan lova lo pem lut – Hindu, Sikh, Buddhist, Jain, Parsi leh Kristian-te chu kum 6 an awm hnuah India khua leh tui nihna pek theih an nih dawn avangin he Bill hi a him lo hle-a an ngaih thu an sawi.

Mizoramah chuan kum 1901-a chhiarpui hmasa berah ram dang atanga lo pem lut, Buddhist chu mi 198 chauh an awm a, heng mite hi India-in zalenna a neih hma zawng khan India khua leh tui nihna pek an ni lova, Bangladesh atanga dan lova lo lutte hi an pung chak hle a, kum 2001-ah khan Buddhist 1,50,000 vel, Mizoramah an awm tawh a, hei hi mihring inthlanpun dan pangngai piah lam niin a lang a. Election Commission of India chuan ram dang mi, kum 1950 January hma lama India rama chengte chu Electoral Roll-a thun a remti a, hemi ang hian kum 1950 hma lama Mizoram cheng tawh leh an thlahte chu thliar hran harsa lo mah se, Bangladesh atanga dan lova lo pem lut an pun zel avangin harsatna a awm ta niin an sawi. PM, Pu Narendra Modi-a’n Hmarchhak biala dan lova lo lutte chu thawn kir vek an nih tur a lo sawi tawh chu a taka tihhlawhtlin an phut tih sawiin, ZNP chuan, he Bill hi tihhlawhtlin a nih chuan kum 30 kal taa Mizoram buaina ang kha a chhuah leh an hlauh thu leh, hetiang buaina hi a thlen loh nan Citizenship (Amendment) Bill, 2016 hi a rang thei ang bera hnuh kir tha an tih thu an sawi a. Bill hi hnuh kir a nih loh pawhin Mizoramah hmang ve lo tura siam rem an duh thu pawh an lehkhaah chuan an ziak a ni.