Zoram Thar pawlin Temple Square atanga Chanmari Kawn thleng kawng zawh leh

0
756
views

Zoram Thar pawlin vawiin khan Aizawla Temple Square atanga Chanmari Kawn thleng kawng an zawh leh. Hei hi saltang chhuahna jubilee dar vuak, hnehna kawng zawh niin an sawi a, kawng an zawh paha hmun hrang hranga inkhawm an neihah an President, Pu Zaichhawna Hlawndo chuan nakkuma Mizoram Assembly inthlanna turah Mizorama Lal Isua a lal theih nan amah chauh thlan a ngai niin a sawi a, tunah hian Mizoram chu damlo leh thianghlim lo nia sawiin, tihdama then thianghlim a ngai a, Lalpa Kraws thisen thuthlung hmangin tunah hian thenfai mek a ni a, Lal Isua Krista’n a lalna ram a tungding dawn ta niin a sawi. Zoram thar pawl mi, vawiina kawng zawhte hian Millennium Center, Zarkawt kawn leh Chanmari kawnah chawlin an thuthlung ken an au chhuahpui a, ram chu Lalpa ta a nih avangin a neitu an pe tawh dawn a, chutah chuan a neituin ro a rel ang a, ram leh hnam hmangaih mai a tawk lo ang a, a chhiahhlawh, amah tihtu Pathian hriak thihten ro an rel tawh dawn niin an sawi. Zoram thar pawl hian naktukah Chaltlang atanga tanin Bawngkawn, Thuampui leh Zemabawk thleng kawng an zawh leh dawn a ni.