Mizoram Joint NGO Coordination Committee aiawhten Chief Election Commissioner an kawm

0
989
views

New Delhi-a cham mek, Mizoram Joint NGO Coordination Committee aiawhten Chief Election Commissioner, Pu AK Joti chu nimin tlai khan an kawm a, CEC hi Election Commissioner pahnih – OP Rawat leh Sunil Arora te bakah Commission-a mi pawimawh dangten an tawiawm a ni. Joint NGO Coordination Committee hruaitute chuan kum 2014-a Lok Sabha inthlan dawnah khan Tuikuk, anmahni duh thu-a Mizoram chhuahsanten Tripura Transit camp atanga vote an thlak thin duh lohna an lo lantir tawh thu sawiin, nakkuma state Assembly inthlan leh 2019-a Lok Sabha inthlan lo awm turah pawh, kum 2014-a Election Commission a lo intiam tawhna bawhzui a nih dan tur an zawt a. Heng Tuikuk-te hi Mizoramah an lo luh duh loh chuan Tripura-a awm hlen a, vote-te pawh thlaktir nghal mai turin Election Commission hotute chu ngenin, eng inthlanah mah, Tuikuk ten state pawn atanga vote an thlak an remtih tawh loh thu an sawi bawk. Chief Election Commissioner, Pu AK Joti chuan Joint NGO Coordination Committee thu thlen chu Home Ministry nen an lo sawiho tur thu leh, a tul anga bawhzui a nih tur thu a sawi nia hriat a ni.

Joint NGO Coordination Committee hian nizan khan Joint Committee on the Citizenship Amendment Bill 2016 Member, Dr. Vinay P. Sahasrabuddhe pawh kawmin, he bill chungchang hi an sawipui bawk a. Joint NGO Coordination Committee leh Mizorama Political party tin siam, memorandum copy an pe bawk a. He Joint Parliamentary Committee-in state thenkhat an tlawh hunah Mizoram pawh rawn tlawh turin an sawm bawk a ni. Joint NGO Coordination Committee hi an Chairman, Central YMA President, Pu Lalbiakzuala hovin member paruk an thawk chhuak a ni.