Aizawl North I huam chhung Bawngkawnah ZPM Steering Committee din

0
475
views

Aizawl North I huam chhung Bawngkawnah vawiin khan ZPM Steering Committee din a ni a. Hemi puala inkhawm Bawngkawn Bazar-a Pu Lalmangkunga in-a neih hi ZPM Caucus member, Pu Vanlalhlana, ZPM Steering Committee General Secretary, Pu K Sapdanga leh MPP President, Pu C. Laltanpuia ten an hmanpui a ni. Pu K. Sapdanga chuan, hmun hrang hranga ZPM lo dawngsawng a, lo ngaihven thintute chu Kohhran mite an ni deuh zel tih sawiin, mipuiin ram siamthat an duh tawh avangin a nawrin an nawr tawh zawk niin a sawi a.
ZPM-in kalphung thar a siam turah chuan tunhmaa MLA Candidate-te nasa taka zim buai a, an hnen atanga hlawkna hmuh tumna ang chite chu bansan vek a ni dawn a. Mipuiin Candidate-te an tanpui tawh zawk dawn a ni a ti a, sum hmanga vote lei tumte kutah thuneihna dah tawh lo turin mipuite a ngen a ni.

Caucus Member, Pu Vanlalhlana pawhin tuna Mizoram dinhmunah hian Chief Minister lo ni tawh pahnih MPCC President, Pu Lal Thanhawla leh MNF President, Pu Zoramthanga ten mawh an phur nasa hle niin a sawi a. Sorkar laipui atanga tanpuina sum tam tak lo kal chu engmah loah chantirin, tun dinhmun hi min hruai thleng a ni a ti. MPP Presient, Pu C. Laltanpuia pawhin Mizoram chu kawng hrang hranga a intodelh loh avangin mipui rilru a chhe mek niin a sawi a. Hemi tibo tur hian rinawmna, dikna leh thawhrimna nena intodelh tura tanlak a ngai tih a sawi. Bawngkawn ZPM Steering Committee din rual hian an hruaitu tur mi 8 an ruat nghal a ni.