Aizawl North II bialtu MLA, Dr. Vanlalthlana’n SEDP sum hmanga UD&PA-in Chanmari leh Ramhlun inkar kawngpui sira ke-a kalna siamah thil fel tawk lo a awm niin a sawi.

0
340
views

Sorkar hnathawk hlawh puk sak ngai hial khawpa sum harsatna a thlen mek laia Contractor-ten sorkar sum ti hek zawnga hma an la chu pawi a tih thu a sawi.

Dr. Vanlalthlana sawi danin, he hna thawk tur hian mi 4 – Pu Laltlankima Ramthar Veng, Pu RK. Dothama, Ramhlun South, Pu K. Lalchhuanliana Aizawl Venglai leh Pu R. Lalmuanzova Ramhlun North thlan an ni a, Pu R. Lalmuanzova bik hi hna pahnih pek a ni a. He hna kalpui a nih chungchangah hian Aizawl khawpuia Lirthei Parking buaipuitu AMC lam hriattir an ni lo a, kawngpui sir leh lamah lirthei hun reng a ni chunga Footpath siam a ni hian kawngpui a tichep a, Traffic a Jam phah nasa hle a ni a ti.
Contractor-te hian Department hotuten rem an ti lo chungin PAHOSS scheme hnuaia Garage sakna tura thlante luhka-ah nakina chhut chhiat leh ngai turin Footpath hi an siam a, hei hi Contractor-ten an hnathawh mila Bill an lak dawn avanga sum siamna nia a lan avangin a pawi hle tih Aizawl North II bialtu MLA hian a sawi a. Footpath hi an siam duh a nih pawhin, PAHOSS scheme hi tihpuitlin hmasak ni se tha a tih thu a sawi. Heng Footpath siam te hi MLA Dr. Vanlalthlana ho hian thuthar lakhawmtuten an enfiah nghal a ni.