All Mizoram Cement and Iron Rod Dealer Association-in Cement man ti hniam tura an nawrna a hlawhchham avangin naktipah lungawi lohna lantira dawr khar an tum

0
364
views

Cement leh Iron Rod zuar inzawmkhawm pawl, All Mizoram Cement and Iron Rod Dealer Association-in Cement man ti hniam tura an nawrna a hlawhchham avangin naktipah lungawi lohna lantira dawr khar an tum.

All Mizoram Cement and Iron Rod Dealer Association hian Dalmia, Star leh Topcem Cement-in rate an tihsan tihniam leh tura an ngenna chu a hlawh chham a, vawiina Aizawl Press Club-a thuthar lakhawmtute an kawmnaah an pawl President, Pu PB. Sangdingliana chuan, heng Cement Company 3- Dalmia, Star leh Topcem hian June ni 27 khan hriattir lawkna pawh awm lovin Mizoram bikah a man tihsan thut nia sawiin, hei hi June ni 30 khan tihhniam leh turin an ngen nghal niin a sawi a, hei hian awmzia a nei lo mai ni lovin, Company-te kar nana an Kudam an kalh sak pawh chhu chhia-in Mizorama Cement lakluh leh semchhuah kawnga hmalatu, Consignment and Forwading Agent (C&F)-te kaltlangin man to zawkin an hralh lui zel tih a sawi a, chanchinbumite zawhna chhangin, Mizorama Dalmia laluttu, Consignment and Forwading Agent, Pu V. Malsawmdawngliana leh Star Cement Consignment and Forwading Agent, Pu Zosangliana te pawh an thil phut hi an sawipui tawh chungin, tun dinhmunah chuan hma an la tlang thei rih lo tih a sawi.

Pu PB. Sangdingliana chuan, hetianga Cement man tisang an awm hian Company dangin tihsan an tum ve nghal zel avangin Mizo mipuiten man tlawm zawka Cement an lei theih nan tuna an hmalakna hi thlawp vek tur leh heng Cement Company 3- Dalmia, Star leh Topcem hi tun dinhmunah tuman lo leisak lo turin Mizo mipui zawng zawng an ngen tih a sawi a, Cement man tihsan a nih vang hian a zuartute tan harsatna a awm lova, a leitu mipui tan a to lutuk dawn vanga dodal ta an nih thu leh an thil tih chu mipuiten thlawp vek thei se a duh thu a sawi a, Cement man chungchanga nikuma MSU-in hma a lak \um pawh khan Sorkar hotute an lo dawr tawh thu leh eng Department ber nge an mahni buaipui thei tur pawh an hriat loh thu sawiin, a tirah Taxation Department-ah an kal a, an nin Commerce and Industries Department-a kal turin an ti a, an ni pawh hian Legal Metrology Department lam an lo kawhhmuh leh nia sawiin, an harsatna chu sorkar hotuten beng khawnin, hmalak sak vat se an duh tih a sawi.