He thu hi vawiina MSU-in Inter College Cultural Competition an buatsaih a hmanpuinaah sawiin, Pu R Lalzirliana chuan, Mizorama hnam dang te umchhuak turin Mizo \halai ten an mawhphurhna an hlen a \ul a, hnam dangten thawh hreh an nei lovin hna chi hrang hrang an thawk a, hetang bawk hian Mizo \halaite pawhin thawhhreh nei lovin an thawh ai zawng zawng thawk se, hnam dangin hnathawh tur an neih loh miau chuan Mizoramah an awm reng peih dawn lo tih a sawi. Pu R. Lalzirliana chuan, hnathawk chhawr nuam leh hnam dangte anga dawh theihna neih pawh a \ul tih a sawi a, a chhawrtute duhdan zawm thiam pawh a ngai tih sawiin, hnam dangte thiam ang \halaiten an thiam a ngai a ni, a ti. Pu R Lalzirliana chuan, Mizo \halaite ruihtheihthila buai an tam lutuk chu inenfiah a \ul hle tih a sawi a, Tuikuk leh takamte chimral aiin ruihhlo avang a ral chu a hlauhawm zawk tih hre turin \halaite a fuih a. Nu leh pate pawhin an fanute pasal tlak ruihtheihthil laka fihlim an zawng \an mek a, chutiang a nih loh chuan Mizo hmeichhe \ha ten hnam dang an neih zo palh ang tih a hlauhawm avangin \halaite chu ruihtheihthil laka inthiarfihlim turin a chah a ni.
