Chakma Autonomous District Council inthlanna kumin April ni 20-a neiha Fultuli biala Congress Candidate, Pu Kali Kumar Tongchongya chuhtu awm lova tlinga Returning Officer, Pu N. Chakhaia’n a puan chu Guwahati High Court Aizawl Bench-in a pawmpui.
Hemi chungchanga thutlukna hi tun thla ni 22, Zirtawpni khan Justice N. Sailo chuan a siam a ni. Hemi hmalam hian Fultuli biala MNF Candidate Pu Sumir Tongchongya chuan Returning Officer thutlukna siam chu dik lo tiin Guwahati High Court Aizawl Bench-ah a khing a, Returning Officer-in MNF Candidate nomination paper a hnawlna chhan chu candidate thlawptu chu District Council sorkar hnathawk a nih vang a ni a, hemi chungchang hi Court-in a ngaihtuah hnuah Returning Officer \anna chu a dik tih pawmin MNF Candidate-in a khinna chu a hnawl sak ta a ni. Heti hian Member 20 awmna, Chakma Autonomous District Council-ah MNF member 8, Congress member 7 leh BJP member 5 an awm dawn ta a, hemi hmalam hian BJP member te leh Congress member te chuan United Legislature Party siamin an hruaitu atan BJP President, Pu Santi Jiban Chakma an thlang a, Pu Santi Jiban Chakma hi kumin May ni 4 khan Chief Executive Member atan Lawngtlai Bawrhsap, Pu N. Chakhai chuan rinawmna thutiam tirin a la lut a, hemi hnu hian Executive Member tur te pawh lakluh leh tawh an ni. Fultuli bial a\anga Congress ticket-a thlantlin Pu Kali Kumar Tongchongya hi naktukah Chawngteah Chakma Autonomous District Council member atan Lawngtlai Bawrhsap, Pu N. Chakhai chuan rinawmna thu tiam tirin a la lut dawn a, Lawngtlai a\anga ZONET thu dawn danin Lawngtlai Bawrhsap hian vawiin chawhnu khan Chawngte a pan a ni. Pu Kali Kumar Tongchongya CADC member atana lakluh a nih hnuah CADC sorkarah hian BJP member 5 leh Congress member 7 ten sorkar an thlawp dawn a, opposition lamah MNF member 8 an awm dawn ta a ni.
