Tlabung khua leh a chhehvel a Chakma awm ten Bangladesh-a an chhungte awm, India rama an lo luh theih nan Aadhar Card an siam sak thin ni a Tlabung MZP ten tun thla ni 4 a thu chhuah an siam chu a dik leh dik loh chhui chiang thuai turin Aizawl Edenthar veng-a awm Pu Melvyn Vanlalhlimpuia chuan Mizoram Police a ngen. Hemi chungchanga FIR hi Aizawl Police Station-ah nimin khan a thehlut a, chutah chuan Bangladesh-a Chakma ten India ram khua leh tui nih duhin nasa takin an bei thin ni a Tlabung MZP hruaituten an sawi leh Tlabung leh a chhehvel-a Chakma ten Bangladesh ramchhunga an chhungte awm India rama an lo pem luh theih nan Aadhar Card dik lo takin an siamsak thin ni a an sawi leh Tlabung leh a chhehvel khuaa Booth Level Officer leh Village Level Officer te pawh hemi chungchang hi zawhfiah tul a tih thu a tarlang a ni. Hetih lai hian nimina Chawngte-a Chakma tlawmngai pawl hrang hrang huaihawta kawng zawhna a MZP hruaitute leh anmahni pui bawmtute inkara innawrna thleng vanga boruak danglam deuh awm chu MZP hruaituten nimin tlai a Chawngte an chhuahsan hnuah boruak sosang awmzui lovin a dai zui leh ta niin Police hotute hnen atanga thudawn a ni. Puan tawh angin Mizoram Quota-a MBBS zir tura Chakma zirlai 4 thlan tel ve dodal zawng a MZP hmalakna duh lovin
Chakma tlawmngai pawl hrang hrangte chuan nimin khan Kamalanagar-I atanga tanin kawng an zawh a, Kamalanagar II-a Chawngte SDO (Civil) Office-a Memorandum thehluh an tum chu MZP ten an lo dan avangin in nawrna a thleng a, amaherawhchu buaina lian tham a thleng lo a ni.
