Chief Minister, Pu Lal Thanhawla’n Sorkar laipuia BJP Sorkar chu term khat pawh an hman zawh hmain a tlahniam leh mek niin a sawi a, kum 4 chhung thuneihna an chan hnuah pawh inthlan hmaa an thutiam hrang hrang an la tihhlawhtlin loh avangin an lakah sumdawng hausa leh \halaite an beidawng \an mek niin a sawi. Vawiina Congress Bhavan-a inkhawmah Pu Lal Thanhawla chuan, chhan leh vang awm lova Sorkar laipuiin pawisa note lian a tih hlum khan nghawng \ha lo a chhuah \an mek nia sawiin, India ram sum leh pai dinhmun a tlahniam a, pawisa an tih hlum chhan nia an sawi pawh tihhlawhtlin an la nei lo a, ram danga dan lova sum cheprelh awm nia an sawi pawh pakhatmah laklet a la awm lo niin a sawi. BJP chu an thutiama an din loh avangin an chakna hnar, state hrang hranga an thawhpuiten an chhuahsan mek niin a sawi bawk. MPCC President Pu Lal Thanhawla chuan, Mizoram Sorkar Flagship Programme, NLUP chu \ha an tih em avangin Sorkar laipui hotute hnenah Party dangin an hek \hin niin a sawi a, NLUP chu Sorkar Flagship Programme a nih miau avangin hek ngawt theih a nih lo a, Sorkar laipui pawhin sawi tur vak a nei chuang lo niin a sawi a, NLUP chhawm nun nana NEDP an duan phei chu NEC in \ha a tih em avangin hmarchhak biala State dangte chu entawn ve turin a hriattir zawk niin a sawi.
India khua leh tui nih theihna dan siam\hatna Citizenship (Amendment) Bill 2016 chu a \hat loh avangin a tir a\angin an party chuan a dodal nghal tih Pu Lal Thanhawla chuan a sawi a, he dan thar hnuaiah hian ramdang a\anga lo pem Hindu-te chu khua leh tui nihna pek mai theih an nih dawn laiin, Kristian leh Muslim-te chu bill duangtute ngaihtuahnaah an tel loh vangin \ha an ti lo tih a sawi.
He inkhawm hi MPCC General Secretary, Pu R. Liantluanga’n a kaihruai a, Pu P.C. Zoram Sangliana MLA in thu a sawi bawk.
