Congress Legislature Party Leader, Pu Zodintluanga’n Speaker hova Thawhtanni-a inhmuhkhawmnaah agenda mumal a awm lo tih a sawi a, MLA hlawh leh Fund thawh chungchang inhmuhkhawm leh huna sawi tur tia thudah awm anga sawi chu thu dik tawk lo a ni a ti.

0
15
views

Bairabi Zophai ramri-a ramri-a Duty-te a tlawhnaah chanchinbumte zawhna chhangin Pu Zodintluanga hian sum a harsa a, MLA hlawh leh Fund thawh tura an ngen a nih chuan Congress Legislature Party chu an inhuam reng tih chu an dinna ngai reng a ni a ti.

Sorkar hnathawkte an hlawhpui basic pay atanga zaa 10 leh zaa 5 te Covid-19 dona tura thawh tura thurel chungchangah Congress legislature party leader, Pu Zodintluanga hian Mizoram sorkar chu sum leh paiah a harsa tak tak a nih a, tanpui a ngai a nih chuan Minister leh MLA rualte chu a che hmasa ber tur, hlawh atanga pawisa thawh hmasa ber turah an inngai tih a sawi a. Hei hi MNF leh ZPM MLA te chuan an ngaimawh hle a. MLA ten sorkar sum bawma tanpuina an chhunluh dan tur chu Thawhtanni-a lo sawi ho tawh, thutkhawm leh hun atana thudah lawk a ni an ti a, Pu Zodintluanga chu politics-a hamthatna lak tumah an puh a ni.

Sorkar hnathawk Group A, B leh C ten an hlawhpui Basic pay atanga zaa 10 leh Group D ten zaa 5 zel, May thla atanga December thla thleng Covid-19 dona atana thawh hi Thawhlehni khan Chief Secetary hova sorkar hnathawkte thutkhawmnaah rel a ni a, hei hian sawizui a hlawh nasa hle a, a tuk Nilaini-ah Pu Zodintluanga hian Minister leh MLA te chu che hmasa tura ngaih an ni tih hi a sawi a, Ningani-a Speaker Pu Lalrinliana Sailo hova MNF, ZPM leh BJP MLA te thukhawm chuan MLA te basic pay atanga zaa 30, May atanga December thla thleng Covid-19 dona atana thawh leh MLA Fund atanga cheng nuai 50 theuh thawh khawm an rel zui ve leh a ni.