Congress Legislature Party hruaitu Pu Zodintluanga chuan an May thla hlawh basic pay pumpui Congress MLA 5 ten an thawhkhawm hi Chief Minister’s Relief Fund-ah ni lovin, Covid dona atana hman turin an pe tih sawi mahse, Chief Minister Relief Fund chu tun dinhmunah Covid dona atan bik chauha hman a nih avangin congress MLA te sum thawh pawh heta lut anga ngaih mai turah an ngai tih Chief Minister Office atanga Zonet thudawnna chuan a sawi.
Congress MLA ten sum an pek thu Twitter-a a tarlanah pawh Chief Minister Pu Zoramthanga chuan cheng nuai 4 hi Chief Minister’s Covid-19 Relief Fund ah chhunluh a ni tih a ziak a. Instagram-a Congress MLA te sum thawh chungchang a tarlanah pawh cheng nuai 4 hi Chief Minister’s Covid-19 Relief Fund ah chhun luh a ni tih a tarlang a, ‘hma lam hun lo thleng zel tur atan pawh Mizoram sawrkar pui tura ruahmanna an neih thu te an sawi a, a thlamuanthlak khawp mai’ tih Chief Minister hian a ziak a ni.
MLA ten an hlawh atanga Covid dona tur an thawh dan tur chungchang hian titi a ti tam hle a, May ni 7-a Speaker hova MNF, ZPM leh BJP MLA te thukhawmin MLA te basic pay atanga zaa 30, May atanga December thla thleng Covid-19 dona atana thawh leh MLA Fund atanga cheng nuai 50 theuh thawh khawm an rel hnuah, May ni 15 khan MNF Legislature Party Secretary, Pu L. Thangmawia chuan Speaker, Minister, Dy. Speaker leh Deputy Government Chief Whip-ten an hlawh, basic pay zaa 50 leh Chief Minister-in zaa 60 zel May atanga December thla thlengin an thawh dawn tih a puang leh a. Congress MLA te hian nimin khan May thlaa an basic pay pumpui hi covid 19 dona atan an pe thung a ni.
