Mission Organic Mizoram hnuaia Aizawl District Spices Producer Organisation-in Melriat daia Road side Market an sak leh Online Vegetable Market Chain kalpui tur chu vawiin khan hawn a ni.

0
167
views

Chemical hmang lova chin thlai thar chhuahte hi he market-ah hian lei theih a nih rualin, Aizawl khaw chhunga chengte tan Online Marketing-MizDen kaltlangin online hmangin thlai mamawhte order theih tura duan a ni a. MizDen Application hi google playstore-ah download theiha dah a ni.

Heng thil chi hnihte hawngtu Agriculture Minister Pu C Lalrinsanga chuan, Chemical tel lova hmalakna Mission Organic hi hun rei tak atanga a lo buaitawh a nih thu leh MNF Sorkar hmasak tum atang tawha Organic Bill pass a nih theih nana hma lo la tawh a nih avangin a hlawhtlinna hmel hmuh a ni chho ta chu a lawm hle tih a sawi a. Mizoram leilung chu khawih danglam loh, Virgin Soil a nih avangin nasa taka hman tangkai theih a ni a, sorkar laipui pawhin hemi hi hriain chemcial tel lova hman tangkai chu a ngai pawimawh hle a ni, a ti a. Chief Minister, Pu Zoramthanga pawhin Organic hmanga thlai thar hi a ngai pawimawh a, hei hian mipui hriselna a ngaihpawimawh zia chiang takina a tilang tih Pu Sangtea hian a sawi.

Aizawl South III bialtu MLA, Horticulture Development Board Vice Chairman, Prof. F. Lalnunmawia pawhin, an bial chu thei leh thlaia Aizawl chawmtu pawimawh tak an nih sa avangin Organic hmanga hmalakna hmunpui an ni ta chu hmasawnna tha tak a nih thu a sawi a. Agriculture Development Board Vice Chairman, Pu H. Biakzauva MLA pawhin, he hmalakna hmang hian loneituten thlai thar man m^n zawka an hralh theih dawn avangin intodelhna kawnga mipui hruaitu a nih theih a beisei tih a sawi. He inkhawm hi Agriculture Secretary, Pu Lalhmingthanga’n a kaihruai a, Mission Organic Mizoram State Coordinator, Pu Lalhmingmuana sawi danin, Road side Market hi kuthnathawktute sum hmanga sak a ni a, a sak nan hian cheng nuai 5 vel an seng a ni.