Vawiina Lunglei District Congress Committee-in Lungleia an Party Pisa-a inkhawm an buatsaihah he thu hi sawiin, Pu PC Lalthanliana chuan, MNF-in thla 8 vel thuneihna an chan chhunga thil theng langsar ber chu Chief Minister chungchanga Minister pakhatin mipui a ngenna hi a ni, a ti a. Chief Minister meuh, a Minister-in nuihza siamna ang leka Zoram mipuiin an hmang anga a puang ta mai hi amah zawk hian nuihza siam nan Chief Minister hi a hmang zawk a ni mai lo maw tih chu zawhna awm thei a ni tih a sawi.
Pu PC Lal Thanliana hian MNF sorkar chu thla 8 leka upa ala ni chungin an hotupa, Chief Minister Pu Zoramthanga’n mipuite dawt a hrilh zing hman hle niin a sawi a, Jet Airways service loh chhanah runway chhiat vang tih te, May thla hnuah AR sawnchhuah an ni dawn a tih te leh an thutiam dang zawng zawng te ngaihtuahin an lakah beisei tur a awm tawh lo tih a chiang a ni, a ti a. Chief Minister-in Mizoram Budget chu Tuikhura tui khawh lut pur pur, leh lama liam pur pur anga a sawi laiin, Congress Sorkar laia VC te tana cheng Vbc 45.44 dah fel tawh pawh tun thlengin hman theih ala ni lo a ti a, Lunglei By-Pass Road atana Congress Sorkar-in Rs. Vbc 10 a dah pawh hna \an a la ni thei lo tih a sawi a, Treasury hrang hrang chu pawisa luangchhuak thei lova thunun a ni a ti bawk.
