Fakselna (12th August, 2017)

0
405
views

India ramah Political Party lian tak tak pahnih an awm a. An dinhmun leh kalphung hi ngun taka bih chian chuan Pu Nehru-a Policy ril tak, “NATIONAL DEVELOPMENT” kha Pi Gandhi-i te khan an kalsan ta daih mai a. Tuna Pu Modi-a hian a chhar a, he NATIONAL DEVELOPMENT hi India ramin a lo mamawh hle si a. Pu Modi-a hian a takin a kalpui ta a ni. Hemi chhuh let tur hian bawng talh khap thu leh sakhuana thila inpuhmawhna hmanga HINDU FIRFIAK tia puhna te, SAKHAW TIH BIK NEI LO intih bikna hi Mizorama put luh a lo ni ta zel a. Hindu leh Hindu, Party thila an inbeihna thu hi Mizote hian kan lo chiang lo tak zet a. Pu Modi-a hi Kristian tiduhdahtu anga puhtute hian bih chiang se, an zak haw hle ang. Tuna Rahul-a ngei pawh hi Kristiante tiduhdahtu ti ta vak vak mai ila, chutiang tho chu a ni. Sakhuana hi Politics thila hman luih tlat hi a him lo.
PH FANAI
————–

Zonet Senhriin vai film serial, Kuch Rang an rawn pek hi engatinge a ngai ringawt in rawn pek a? A zawmna en ch^kin kan lo chang ve bawk a. A ngai bawk in rawn pe leh thin a, in niangnai lo em mai. Ningani zanah pawh Thawhlehni zana mi bawk in rawn pe leh a, engnge a awmzia? In thilpek hi zan tin lo chang kan awm tih kha lo hre tawh rawh u. Kal pah mai mai chi a ni lo, chiang takin en thin tawh rawh u, in fimkhur lo em mai.
No. thup
—————-

Tun anga channel chiangkuang lo thlak kual rengah hian pre paid-in en man in khawn a nia, in huai mang e.
The Colonel
—————

Congress sorkarah mi kan rethei tlawk tlawk mai zawng a nih hi. MNF lah kha eng an ni chuang lova, ram mipuite tan chuan a va beidawnthlak tlawk tlawk ve. Han inhlawh dawn ngawt ila, tun hmaa lo inhlawh ve thin tan lo chuan han inhlawh ve ngawtna tur lah a vang bawk nen, kan harsatna hriaa hma la tur awm deuh lah chu awm thei deuh an lo nia. Hma lakna tak tak awm lo, Lal Thanhawla leh a hote hian a ram mi retheite dinhmun hi engtia hai der lui tlat nge a nih?
9615174245
—————

Dawt sawi hmang hruaitu neih hi a vanduaithlak tak zet a ni. A sawi leh tur pawh ‘dawt bawk’ tih ang chi hi zawng i hnawl tawh ang u, kan chhiat phah zel dawn e!
Thlirtu
—————–

Muster Roll-te hi sorkar hian ngaihtuah ve teh se. Department-ah chuan hnathawktu ber kan ni a, lu man nei lo, pension pawh nei lote hi sorkar hian a en liam mai mai kum tin dawn em ni? Pension nei lo, hamthatna engmah nei lo, zum leh hriam kara thawk thin, chetsualna avanga thihna leh piansualna tawkte hi hamthatna ngelnghet min siamsak sela, sorkar hian min en liam mai mai tawh lo hram sela, promotion te hi engtikah tak set tak ang maw?
Ruattea
—————-

Fakselnaa hnam pasalthate ruhro pawh zah lo anga MNF-te rawn sawitu khan ruhro chungchanga hma lak tumna i neih ve, sawi leh hriat awm si lova MNF-te thiltih sawichhiat leh fam tate ruhro, hetiang leka i ngai hi chu hnam tan pawh mualphona thlen theitu a ni mai lovang maw? Keini chuan kum khat emaw, kum 30 dana mi pawh ni se, kan hlut dan leh kan ngaihsan dan a ngai reng. MNF hian an ak tha emaw, an thlulkhung emaw, a eng huna pawh chu lo ni se, ka ui, ka ar a ni titu dang an awm kan hre lo tlat. Leilunga luan raltir mai mai hi kan thil tum a ni ve lo a ni tih i lo hriat kan duh takzet a ni.
Tlabung Uitangrual
—————-

Kan sorkar chak tak, zu zuar, kawng siam tha thei si lo, Contractor ho lah hian engmah hi an siam tha duh tak tak bawk si lo. Zoram hmangaihna thinlung an pu lova, mahni veng chhung hmangaihna thinlung tal pawh hi an pu hlawm hlawl lo. Hunthar venga tui luan kawr siamtu pawh khan tui pipe te i tichat a, kawngah tui a luang a, lei pawh a inpaih tha lova, kawng a tinal hle a i. Two wheeler tan phei chuan kal a harsa a, ke li nei chi pawh an táng a nih kha. Chuvang chuan i hna kha veng chhung hmel tilang thei tur tal chuan thawk tha teh. Tin, Hunthar Veng leh Edenthar Veng ten tan la teh u. In veng chhungah lei min a tam a, kawng a chhe hle. Slum Area in sakah pawh mi cheng an awm tawh a, mahse kawng chhia avangin a kal hleih theih loh a nih hi. Mahni Veng chhung siam tha-in tan la teh u.
Lalmimi-a
————-

An sawi angin CAG report hi a rintlak tak tak loh chuan sum tam tak leh tha, ngaihtuahna tam tak sengin engatinge an buatsaih duh? Rintlak hlei lo report buatsaih chu sorkar leh mipui sum khawhralna mai mai a ni lo maw?
9774354495
—————-

Cable TV Operator-ten channel package tih tur in tih kha chiang fek fawkin subscriber-te min hrilh thei ula, a lawmawm ngawt ang. Package 1, 2, 3 ah te engte nge in pek dawn tih te a mal malin chiang deuhin rawn sawi rawh u. Pawisa tam tak sawi vak lo hian in subscriber, khawsakna inthlau tak takte min hrilhfiah a ngai khawp mai, kan indawr ta sa sa bawk si.
Zualtea pa
————-