Fakselna 3rd February, 2018

0
674
views

A thinrimthlak tih chu thuhran lo ni ta sela, a mak ka tih deuh mai chu Kristian rama hotupa ber vengtuten mi pakhat na takin kut thak hnawih nan an hmang a. Chu a chhapah, kut kan thlak lo an la ti. A mak thlawt chu a ni. Chu ai chuan, ‘Ni e, kan lo thiam lo palh a ni e, khawngaihin min ngaidam ula, in mi hriatthiamna leh ngaihdamna sang ber kan dil a che u’ ti zawk mai se, mipui lamin kan ngaidam ang a, a kut tuartute pawhin an ngaidam duh zawk tur. Dawt hi a dingchang ngai lova, thudik erawh chu tantu nei lo pawhin a ding chhuak thin. Engpawh ni se, Lal Isuan vanram kai lo tur a sawite zingah khan DAWT SAWI HMANG TE a ti tel tlat! Judgement Day i lo nghak phawt ang u. Keini Kristian zaa za hi engnge kan an dawn i lo thlir ang.
The Viewer
————–

Kumin zet chu kum 2000 hnuah MLA tum li thlanna tur a ni ta der mai. Tun boruakah chuan amah PU HAWLA leh a nghalrualte hi an din chhuah leh hmel riau. ZPM ho lah hi an inbeisei ang aiin an thang mawh riau bawk si. Nek zo ber tura kan ngaih, MNF te lah hi len belh aiin tet lam an pan hret hret emaw tih palh awl an ni hian a hriat a. ZPM party than chak vak lohna ni awm chu sorkar officer pension tawh leh politics thila mipui ei vak tawh loh ho a phusa ber bera an tangte hi a ni thei mai lovang maw? Mahse, MNF party ai hi chuan an chet that zawk mahte pawh a rinawm ve thei rum rum. Congress party pawh hi inthlan hmasak ang em em kha chu an ni thei tawh dawn lo tih an hriat tlat. BJP leh PRISM te tan erawh kawl a la eng ve lo e.
Bawiha pu
————-

Kan CM-in opposition-in sawiselna tur min hre lo a tih hi a dik tulh tulhin ka hria. Kan opposition ho hian thil hi an zir peih lo. Kum 10 chhunga kawng chhia min zawhtir te, zirnain rawih zelte leh hnathawktu hlawh pek that theih loh te a tam mai. Awm hmuna lo awm mai mai tan pawh sawiselna tur a tam nen le! Lo sorkar tehreng pawh ni se an eng ual hauh bik hmel loh hle.
RK Sanga
————-

YMA hian kumpuan tih a sawi lar em em a, a tha e. Mahse, Aizawl kan vengah chuan YMA a lo inhmang tak takte leh tunlaia veng chhunga YMA hruaitu thenkhat hi chuan an in, vai thir chhe dawr atan an luahtir tho si a, vai ho hian man to zawkin an luah duh zel bawk si a, YMA kumpuan nen a va inhmeh lo em, sum hmuhna turah chuan khua kan hmu thei thlawt lo chu a nih hi.
Aizawl pa
————

Vanglaini chanchinbu hian tan lam a va nei ta ve le. A neutral viau thin asin maw le.
KL-a, Chaltlang
————-

Canon printer hi a tha khawp mai. Mahse, servicing lam hi duhthu a sam lo deuh ka ti.
Mr. BAHADUR
——————-

Tukin Vanglaini chhuaka Congress Bhavan-a Pu Hawla thusawi, Tripura refugee camp-a Tuikukte chu an party-ah lawm luh an tum thu an rawn tarlang a, mahse, engemaw harsatna avangin an lawm lut leh loh thu an sawi. Tuikuk leh Chakma te nena sorkarna siam duh zawng chu Congress-ah vote thlak mai tur. Kei chuan ram phatsanah ka ngai hmiah! Ram chu Lalpa ta a ni si a, hnam dang ta a ni lo, kan ram a ni. Hetianga Chakma leh Tuikuk vote mamawh ngawih ngawih party Congress-in hma an lak zel lai leh, YMA-in kumpuana ram leh hnam humhalh a puan mek laia, mi tam tak YMA member in ni ve tho te, zu zawrh duh lo anga lang, kohhran hote, Congress party-a in la awm tang tangte hi a mak a ni.
SANGA
———–

Congress sorkarin zu a zawrh vanga mi nunna tam tak kan chan tawh bakah kawng chhiat vang leh zirna an suasam avangte leh thil dang tam taka harsatna tam tak tawka, mipui manganga, rum au rawl nena kan phun nuaih nuaih chung pawha Pu Hawla’n, “Eptu lamin min sawiselna tur an hre lo” a han ti hi chu a tawngvaite hi a ni zawk hial lo maw? Ram tana thil tha hmachhawp turte sawi kur ve duahin lo sorkar leh pawh nise, mipuite hi dawt bak min hrilh leh dawn chuang lo tih mipuiten i hria ang u.
Tlabung Uitangrual
———–

Kum a thar ta bawk a MLA inthlan boruak a lang ta ut mai. Congress ho lah buai tulh tulh, MNF leh party dangten remchangah an lo la bawk. Ticket chan tum an phe leh suau suau mai dawn a, kan han inthlang mah anga sumpai engzat nge luangral ang aw? Van lamin min thlir dan tur ngaihtuah lek lovin Kristian piangthar inti, kohhrana inhmang tak takten dawt sawiin kut tling lovin sum an rut leh ang a, a petu lahin ei ruk sum bawlhhlawh mah ni ta ni lo, ui map lovin an vawrh leh dawn a, Kristian dik tak, mi piangthar, Lal ISUA neitu i nih chuan lo hnawl ang che. Kohhran hruaitu te u, dik takin politics a khelh theih, mi dik lote avanga dik loh ve kher tur a ni lo. Pathianin min hmu reng a nia, kan ram pum hian kan tuar palh ange, kan LAL hi chu a ngawi reng leh dawn a, engkimah i fimkhur mawlh teh ang u.
Chhim pa
————-

ZPM tangrual pawl hi an Policy chu tha viau mah se pawl pakhata an awm si loh leh an CM tur an vawrh chhuah ve ngam si loh chuan mipui hian an bawh tak tak duh ang em le? Party lian ber ZNP-ah inchhung khawm vek ta se, CM tur zuar chhuak thei bawk se mipui an tawmim lo zawk lo’ng maw tih hi keini Neutral ho chuan kan lo ngaihdan a ni.
Neutral Group, Aizawl
—————

Nuam tawl chakna chu sum ngainatna a ni a, sum ngainat chu sual tinreng leh milem biakna a ni. Mi hausaten vanran ram an lut dawn lo, hriau benga sanghawng sei luh a awlsam zawk Isuan zuk tia maw le.
9612131627
—————

Thawkho Party zinga Party pakhat chuan an thawhhona hi a ringhlel deuh an tih a dik em? Nge amah a nghing zawk?
VL Ruata
————

Fakselna hi rawn tichhuak tam deuh teh u, keini ang chuan BENG berah kan nei ve asin.
Duata pu
———–

Miss Mizoram contestant-te height hi rawn tarlan dan a awm lo’m ni? Viewer choice te thlan a ni leh dawn si a, vote tur te kan hriat theih nan.
8794528419
————-