Hmun hrang hrangah faina beihpui thlak

0
600
views

Khatla veng faina beihpui thlak chu Bialtu MLA, Pu Vanlalzawma’n tukin khan Khatla kawnah a hawng a. Hnampa, Mahatma Gandhi-a’n nasa taka a lo buaipui tawh, faina chu tun thlengin sorkarin a la bawhzui ta zel nia sawiin, MLA fund an hmannna tam ber pawh vantlang zun in leh inthiarna siamna atante niin a sawi. He inkhawm hi he veng Local Council Chairman, Pu Ramliana Ralte-in a kaihruai a ni.
————

Khatla East Welfare-in faina beihpui thlak an kalpui tur chu vawiin khan Aizawl Mayor, Pu PC Lalhmingthanga’n a hawng a. Aizawl khawpui chu ala fai tawk lo hle nia sawiin, khawpui a lo thianghlim zawk theih nan luikawrte then thianghlim hmasak a ngai \ul thu a sawi. He inkhawm hi Khatla East Welfare Senior Vice President, Pu Lallianmawia’n a kaihruai a, bialtu Councillor Pu Lalhmingmawia’n thu a sawi bawk. Khatla East Welfare President, Pu Lalbiakzuala chuan, Aizawl khawpui chhunga veng fai ber nih an tum thu leh, hemi atan hian bawlhhlawh bawm, a tam thei ang ber hun an tum thu te, a buaipuitu turin Khatla East Beautification and Sanitation Sub-Committee pawh din a nih tawh thu a sawi a ni. Khatla East Welfare hi vawiin khan an veng chhung tifaiin an hnatlang nghal a, mi \hahnem tak an thawk chhuak a ni.
——————

Vawiin, faina hapta hawn ni khan Bethlehem Veng leh Bethlehem Vengthlang mipuite chuan an thlanmual in\awma thlante tihfai beihpui an thlak. Thlan tihfai beihpui hi Bethlehem Vengthlang Branch YMA Thlanmual Sub Committee bul tuma neih a ni a, mi 1,500 chuang an thawk chhuak a, chhun lama hna dang thawk duh, zing kara an chhungte thlan tifai mi 200 vel an awm bawk. Hnatlangte hian mahni chhungte thlan \heuh an tifai a, hmun danga pem chhuak tawh leh an chhungte thlan tifai thei lote chu hnatlang hian an tihfaisak a ni. Thlanmual Sub Committee member hian hnatlangte in tur thei tur a sem bawk a ni. Bethlehem Veng thlanmual hi kum 1960 vela hman \an a ni a, an veng hi Bethlehem Veng leh Bethlehem Vengthlangah kum 1991-a \hen a nih hnuah pawh Thlanmual hi an la inhman \awm zel a ni.
—————–

Republic Vengthlang Sanitation Committee-in an veng faina hapta an hman tur chu tukin dar 7 khan an veng YMA Hall-ah Aizawl Deputy Mayor, Pu Lalringliana’n a hawng a. Tlawmngai pawl leh Kohhranin veng chhung faina kawnga hma an la \hin chu \ha a tih thu leh la ti ve ngai lote pawhin entawn thei se a duh thu a sawi. Republic Vengthlang Sanitation Committee hian faina kawngah nasa takin \an a la \hin a, thla thum danah faina chungchang inzirtirna an buatsaih \hin bakah thla tin, Inrinni hmasa ber chu vengchhung faina ni-ah an hmang \hin a, a vawi hnihna chu veng chhunga naupangte pualin faina ni-ah an hmang \hin bawk. Sanitation Volunteer dinin, chawlhkar tin, Thawhlehni leh Zirtawpni zingah veng chhung an tifai \hin a, kumin hian vawi 39 an hnatlang tawh a ni. Tukina faina hapta hawnna inkhawm hi Republic Vengthlang Sanitation Committee Chairman, Pu B. Sangkhuma’n a kaihruai a ni.
—————–

Siaha-ah pawh faina hapta hi vawiin chawhma khan DC Conference Hall-ah Mara Autonomous District Council-ah Executive Member, Pu MH Tiabi-a’n a hawng a, kum tluana fai tur leh thianghlim tur chuan rilru lamah faina ngaih pawimawh hmasak a ngai \ul thu a sawi. Faina hapta hawnna inkhawmah hian Dist. Bawrhsap, Pi Harleen Kaur pawh a tel a, faina beihpui thlaka lawmman dawngtu veng hrang hrang hnenah lawmman sem a ni bawk.

—————–

Lawngtlaiah chuan faina hapta hi Bazara Areopagi-ah Dist. Bawrhsap, Dr Arun T-in tukin khan a hawng a, mahni in leh a vel te leh khawtlang vawn fai chu mi tin mawhphurhna a ni tih hria a, \an la turin mipuite a fuih a ni. Faina hapta hawn zawh hian mipui kal khawmte chuan hmun li-a in\henin Lawngtlai khawpui chhung kawng dunga bawlhhlawh an tifai nghal a ni.