Hnahthial District chu coronavirus kai la awm lohna District a ni chhunzawm zel a. Saitual leh Khawzawl District-a hri kai 3 ve ve chu enkawl dam an ni tawh a. Hri kai 3 enkawl dam tawhna, Serchhip District-ah Nilaini khan hri kai thar 2 hmuh belh an nih avangin hri awm lohna District-a puan an nih hnuah hri kai enkawl 2 an awm thar leh a ni. Kolasib District-a hri kai zawng zawng 11 pawh enkawl dam an nih hnuah Thawhlehni khan hri kai 1 hmuh thar a nih avangin enkawl lai 1 an lo neih belh tawh bawk.

0
55
views

Covid 19 hri kai hmuh chhuah tamna ber Aizawl District-ah chuan hri kai 81 an awm tawh a, an zinga 35 enkawl dam an ni a, enkawl mek 46 an awm a. Lunglei District-a hri kai hmuh tawh 57 zinga 47 dam tawhin, enkawl mek mi 11 an awm a. Mamit District-a hri kai hmuh tawh 20 zing 16 an dam tawh a, mi 4 enkawl mek an ni a, Champhai-a hri kai 10 zinga 8 an dam tawh a, mi 2 enkawl mek an ni. Champhai leh Mamit Distroct-a hri kai enkawl mek zinga thenkhat chu hri lakah an fihlim thei dawn nia hriat a ni.

Lawngtlai-a hri kai 12 hmuh tawh zinga 8 an dam tawh a, mi 4 enkawl mek an ni a. Siaha-a hri kai 23 zinga 9 an dam tawh a, enkawl lai 14 an awm a, Siaha-a mi pakhat inkhunghranna hmun a chhuahsan hnua hri kai hmuh chhuahin a kai chhawn theih tura rinhlelh mi 17 te sample chu endiknaah hri lakah an fihlim tih finfiah a ni.

Vawiin khan ZMC Covid 19 laboratory-ah ZMC, Aizawl, Kolasib leh Saitual District atanga sample dawn 200 chuang endik leh a ni a, zaninah result hriat theih beisei a ni. Vawiin khan Falkawn damdawi inah Covid 19 kai thar mi 23 leh hri kai rinhlelh mi 4 admit thar an ni a, rinhleh-te hi an sample lak nghal niin, endik mek a ni a, zaninah result hriat beisei a ni.
ZMC bikah Covid 19 hri kai 46 enkawl mek an ni a, chung mite chu Mipa 42 leh Hmeichhia 4, kum 3 atanga 56 inkar, Aizawl District mi vek an ni. Covid 19 hri kai enkawl mek zinga mi 2 chu vawiin khan an khua a sik bakah an thaw a hah a, an dinhmun endik ngal a ni a, ngaihtuahawm lutuk erawh an ni lo tih Damdawi in thuneitute chuan an sawi. ZMC-ah hian vawiin thlengin Covid 19 kai 98 enkawl an ni tawh a, an zinga 52 chu an dam tawh a ni.