Nimin tuk atanga chin hriat loha bo, Hnahthial rawlthar Freddy VL.Ngheta chu vawiin khan Hnahthial hmarlam YMA Branch hrang hrang ten an zawn chhunzawm leh. Hnahthial atanga ZONET thudawn danin Freddy VL. Ngheta hi kum 17 mi, Pu C. Lalenghluna Hnahthial Peniel veng fapa a ni a. Amah hi Feet 5.3 vela sang ria leh ngo lam deuh a ni. Amah hi nungchang tha tak niin an lawina Kohhran Kristian Naupang Pawl-ah pawh nungchang tha bera thlan a lo ni tawh a. Tunah hian Gov’t High School Hnahthial-a HSLC Exam hmachhawn lai mek a ni bawk. Nimin tuk dar 5:30 vela a nu Pi Zosangliani tawngtai inkhawm kal tur chuan a khumah a la mu niin sawi a. A nu tawngtai inkhawm hawng bang chuan a hmuh tak mai loh avang leh a haw mai tak loh avangin khawtlangin an zawng ta a ni. Freddy VL Ngheta hi ram lam pana a kal hmu nia insawi an awm a, hei vang hian mi tlawmngaite hian ram lamah nasa zawkin an zawng a ni.
