Hri leng mek Covid 19 dolet nan MNF, ZPM leh BJP MLA ten an hlawh basic pay atanga zaa 30, May thla atanga December thla thleng leh sorkar kum kal mek 2020-2021-a MLA Local Area Development Fund atangin cheng nuai 50 theuh Chief Minister’s Relief Fund-ah an pe dawn.

0
324
views

He thu thutlukna hi Assembly Speaker Pu Lalrinliana Sailo hova Legislature Party aiawhte vawiina thukhawmin an rel a, MLA te hlawh, basic pay thla 8 chhung zaa 30 an pek bakah Chief Minister-in thlatin cheng sing 2, Speaker, Council of Ministers, Dy. Speaker leh Govt. Dy Chief Whip ten cheng sing 1 sang 5 theuh thlatin CM Relief Fund-ah hian chhunluh an remti a ni.

Congress Legislature Party aiawhte vawiin \hutkhawmah hian an tel lo a, COVID-19 Fund-a sum thawh leh thawh loh chungchang leh an thawh zat tur thutlukna chu anmahni siam turah Speaker hova thukhawm hian an dah a ni.

Thutkhawmna kaihruaitu Assembly Speaker Pu Lalrinliana Sailo chuan, mi \henkhatin Covid 19 doletna kawngah MLA ten sum leh tha thawh ve lo anga an sawi chu thu dik lo a ni a ti a, March thla khan Minister ten an thla chanve hlawh leh MLA ten an karkhat hlawh theuh Chief Relief Fund-ah an lo pe tawh tih a sawi a, Thawhtanni khan a pisaah Legislature party tin aiawhte nen hmalak zel dan tur pawh an lo sawi ho tawh tih a sawi a, hri leng mek covid 19 dolet kawngah political party te chu hamthat lak tum nan hmang lo tura a duh thu a sawi a, tanrual hun a ni tih hriaa Party tin te chu pheikhai rual taka kal turin a sawm a ni.

MNF Legislature Party Secretary Pu L. Thangmawia pawhin covid 19 do kawngah a mala kal lova, inthuruala kal chu an hotute duhdan a nih thu a sawi a, Thawhtanni-a Speaker hova legislature party tin aiawh thutkhawmnaah pawh an inhuam dan te sawi lan a lo ni tawh tih a sawi a, Congress Legislature Party bik chauh an inhuam anga chanchinbu lama lang chu tha lo a tih thu a sawi.

ZPM Legislature Party aiawha thusawitu Pu Lalduhoma chuan, Thawhtanni a Speaker hova meeting an neih zawh hnuah anmahni lam pawh an thu khawm tih a sawi a, hri leng do let nan a tul ang zela an inhuam thu an sawiho tih a sawi a, sum an thawh khawm te chu a hman dan pawh langtlang taka mipuite hriat theih tura kalpui chu an duhdan a nih thu a sawi.

Meeting-ah hian Dy. Speaker Pu Lalrinawma, Dy. Chief Whip Pu Lalrintluanga Sailo, Pu Lalduhoma, Pu Vanlalhlana, Pu L. Thangmawia leh Pu BD Chakma te an tel a ni.