Hemi atana hriattirna hi vawiin khan Mizoram State Election Commission-in a tichhuak a, LC leh Local Council inthlanna neih tura Electoral Roll ennawn mek chu Covid 19 hri leng vanga loh theih loha chawlhsan lailawk a ngaih avangin hun engemaw chen chhunzawm loh a nih hnuah tun thla ni 15 atang hian chhunzawm a ni dawn a ni. LC leh Local Council inthlanna neih tura Electoral Roll ennawn mekah hian Electoral Roll duan lailawk, Roll-a inthun dil thar leh siam that ngaite chu zawh fel a lo ni tawh a. Karleh Nilai-a Roll ennawnna chhunzawm turah hian Roll atanga hming paih ngai leh siamthat ngaite enfel a ni ang a, hei hi tun thla ni 21 thleng buaipui tur a ni a. Tun thla ni 22 atanga ni 28 chhung Electoral Roll thar hi Print tur niin, Roll siam thar chu tun thla ni 29-ah tlangzarh a ni dawn a ni.
State Election Commission chuan, Electoral Roll ennawn turah hian Sorkar-in Covid 19 hri leng chungchanga inkaihhruaina dan a siamte zawm a nih theih nan District tina Election Officer-te chu an huam chhungah theuh thupek khauh taka chhuah turin a ti a. Mipui inhnaih lova awm tur thupek, hmai tumna hman tur leh kut silfai uar tur thupek chu zawm theuh turin a hriattir a ni.
