ICFAI University Mizoram buaina chinfel dan tur ngaihtuah turin tukina Mizoram sorkar Cabinet meeting-in harsatna zirchiangtu tur Committee a din.

0
321
views

Zingkara Cabinet Meeting hmanhmawh koh hi Chief Minister Pu Zoramthanga hova neih a ni a, meeting zawh hnua Chief Secretary Pu Lalnunmawia Chuaungo sawidanin, ICFAI University Act te leh ICFAI University Mizoram in a harsatna a neih hrang hrangte zirchianga rawtna siam turin committee hi din a ni a, Chief Secretary-in kaihruaiin, Mizoram sorkar aiawh bakah ICFAI University General headquarters aiawh te, ICFAI University Mizoram a thawk mek zirtirtu leh thawktu dang aiawhte he committee ah hian telin, harsatna chinfel dan tur sorkara rawtna thlen tura tih a ni.

Hetihlai hian nimin lama Chief Minister Office-a ICFAI Society aiawhte leh Chief Minister inbiakna-ah Mizoram sorkar sum hmanga ICFAI Society, Hyderabad \anpui tumna a awm nia an hriat avang leh hei hi tukina Cabinet meeting hian a ngaihtuah dawn nia an hriat avangin ICFAI University Mizoram-a zirlai pawl, Student Action Committee leh ICFAI University Mizoram-a thawktu inzawmkhawm pawl Employees’ Forum chuan hei hi an duh lo tih lantirin Chief Minister office bulah puandum sinin lungawi lohna an lantir a, Mizoram sorkar chu ICFAI Society hnena \anpuina sum pe lo tura an duh thu Chief Minister office ah hian ziakin an thlen nghal a ni.

Student Action Committee leh ICFAI University Mizoram Employees’ Forum te hian zirlaite fee tihniam tur leh hmanraw \ha zawk pe turin kumin March ni 28 khan lungawilohna an lo lantir tawh a, ICFAI Society, Hyderabad lamin zirlaite fee tihhniam tumna an neih loh avangin April ni 23, khan Prospectus halin lungawilohna an lantir nawn leh a, August thlaa semester thar \an tura Prospectus siam tawh pawh MZP nen \angrualin ICFAI hmunpuiah hian an thawnlet leh a ni.

Hetiang buaina karah hian ICFAI Chancellor, JP Rammapa leh ICFAI Society Adviser Pu C. Dothanga te chuan nimin khan ICFAI University Mizoram Campus Durtlang North tlawhin Employees’ Forum te leh Students Action Committee te nen inkawmho tura ruahmanna siam a ni a, zirlai te leh staff te hian ICFAI Society laka an lungawi lohna thuziak te kengin pawndum nen an lo hmuak a, Chancellor hi an harsatna sawipui duh lovin motor atang pawha chhuk duh lovin a let san leh niin zirlai leh zirtirtute hian an sawi.

ICFAI University, Mizoram hi Mizoram Assembly in dan a siam, Institute of Chartered Financial Analysts of India University, Mizoram Act 2006 hmanga din a ni.