Kar kalta Nilaini a\anga Zirtawp thlenga I&PR department bultuma chanchinbu mi 15 leh I&PR Officer 5-in Parliament kalphung an zirchianna report vawiina MJA Conference Hall-a an pek a hmanpuinaah I&PR Minister hian, sorkar-in journalist-te tana training leh press tour a buatsaih \hin chu nuamtawlna tur a ni lova, State dang kalphung leh thil tih dan zir chianga, a \ha lai awmte Mizoramin hma a sawnpui theih nana mipui kaihhruai a ni tih sawiin, an thil zir a\anga mipui kaihruaitu nih tum \hin turin a chah a. Chanchinbu mite pawimawhna chu sorkar-in a hriat thu leh sorkar thil tih leh hmalakna puanzar chu an mawhphurhna a ni a, chumi kawngah chuan thudik ziktluak chauh mipui hrilh \hin se, thlei bik leh duhsak bik nei lova hnathawk \hin turin a chah a ni. Pu Lalruatkima chuan, khawvel \hang zelah social media a chak tawh a, mi\henkhat social media hmanga thudik tawk lo thehdarh a awm \hin avangin mipui sukthlek hruai kawi thei thehdarh kawngah chanchinbu mite chu midang kawhhmuhtu ni a, an entawn ni tura \anla turin a fuih bawk.
He inkhawm, MJA President, Pu Lalremsiama kaihhruaiah hian MJA President, Pu Zonunsanga Khiangte pawhin, Mizoram Jounalist-te tan Parliament kalphung zir chianna buatsaih a ni chu MJA tan rahbi thar duhawm tak a nih thu leh hetiang programme \angkai hi siam chhunzawm zel an beisei tih a sawi.
I&PR Director, Pi Lallianpuii pawhin, Parliament House chu mi nawlpui luh phak lohna a nih avangin a zirchiang tura Journalist \hahnem tak an kal thei chu thil ropui tak a ni, a ti a. An thil zir chu tunah chhawr \angkai nghal lo mah se, nakin zelah a hlutna an la hmuh chhoh zel tur thu a sawi.
He inkhawmah hian Parliament zirchianga kal Journalist-ten an thil hmuh dan hrang hrang report an pe a ni.
