Inrinni zan leh Pathianni zan-ah Covid 19 kai hmuh chhuah thar mi 18 an awm belh leh tak avangin ni 7 chhunga Mizorama hrileng kai hmuh chhuah zat chu 41 an tling ta.

0
34
views

Inrinni zana sample 250 test zingah mipa 7 leh hmeichhia 3 in hri leng hi an kai tih hmuh chhuah a ni a, Mamit District mi 7, Lawngtlai 2 leh Aizawl District mi 1 an ni a, Delhi atanga Mizorama lo haw, quarantine lai, symptom nei lo vek an ni.

Nizana ZMC lab-a sample 244 endik zingah 8-in covid-19 an kai tih hmuh belh leh a ni a. Heng mite pawh hi Delhi atanga lo haw, quarantine lai vek an ni a. Mipa 3 leh hmeichhia 5 an ni. Nizana hmuh chhuah tharte hi Champhai District mi 5, Khawzawl District – 2 leh Siaha District mi 1, an ni a, kum 21 – 30 inkar, symptoms nei lo vek an ni.

Mizoramin Covid-19 kai a hmuh chhuah tawh mi 41 te hi Kar kalta Thawhtanni leh nimin inkar, ni 7 chhunga hmuh chhuah vek an ni a, RT-PCR tia sawi, Laboratory hmanga sample tam zawk endik anih hnuah hri leng kai hi nitin hmuh chhuah belh an ni chho ta zel a, hemi hmalam hi chuan Covid-19 kai ni thei awma rinhlelhte chauh laboraty ah an sample endik thin a ni.

Sorkar chuan RT-PCR hmanga sample tam zawk endik tuma hma a lak meknaah District hrang hranga mite sample, a inchhawka endik dan tur a ruahman a, Aizawl District-a mite chu kar tin Thawhlehni, Nilaini, Ningani leh Pathianni-ah endik thin a ni dawn a. Kolasib chu Thawhtan, Nilaini, leh Inrinni-ah, Saitual chu Thawhtan leh Ningani-ah, Siaha chu Ningani leh Pathianni-ah, Champhai chu Thawhlehni leh Zirtawpni-ah, Mamit chu Thawhlehni leh Inrinni-ah, Lunglei chu Thawhtan leh Zirtawp-ah, Lawngtlai chu Thawhtan leh Ningani-ah, Khawzawl chu Thawhlehni leh Zirtawp-ah, Serchhip chu Nilaini leh Inrinni-ah, Hnahthial District chu Nilaini leh Pathianni-ah endik thin a ni ang.