Khatla East Local Council thar CM-in tlawh

0
399
views

Khatla Local Council atanga in dang thar, Khatla East Local Council chu tukin khan CM, Pu Lal Thanhawla’n a tlawh a, an veng chhunga kawngpui zauh dan tur a enfiah. An khawtlang hruaitute nen an inkawmnaah CM chuan, Aizawl khawpui chu Kumpinu sorkar-in a awp lai atangin khawpui thang zel atana ruahmanna tha a awm loh avangin a fel fai tawk lo niin a sawi a. Khawvel thang zel leh changkang chho zelah kawngpui tihlen chu a pawimawh bawk si avangin a theih ang angin a tahtawla a chei tha zel niin a sawi. Pu Lal Thanhawla chuan, tlangram khawpui dangte aiin Aizawl khawpuia kawngpuite chu a chep bik lo nia sawiin, lirthei lei dawna a dahna tur, Garage neia inchhal, lirthei neih hnua kawngpui dunga dah ching an awm avangin kawngpui a tichep a, hetiang tih chingte hi mipuiin ngaih theih loh nachang an hriat a hun tawh niin a sawi a, thenawmte leh vantlang ram neka in sakte sim a, kawngpui vawn fai leh humhalh chu intihhmuh a hun tawh a ni, a ti bawk.

CM hi PWD Minister, Pu Lal Thanzara, PWD Engineer in Chief, Pu Vanlaltluanga, Chief Engineer, Pu Lalmuankima Henry, UD&PA Director, Pu Joseph Lalramsanga leh sorkar mi pawimawh dangten an zui a ni.