Lalhriatpuii ruang chharna Home Minister-in tlawh

0
451
views

Chhinga Veng nula, Lalhriatpuii ruang chharna, Bagha chu vawiin khan Home Minister, Pu R. Lalzirliana’n a tlawh a, Cachar Dist. SP, Pu Rakesh Roshan chu Lalhriatpuii thihnaa mawhphurtu an chhui dan zawtin, a mawhphurtu chhui chhuak tur hian Mizo mipuiten Cachar District Police hnathawh chu beiseina sang tak nen an thlir thu a hrilh a, Cachar SP hian tualthattu an chhuina leh hmasawn dan chu Kolasib SP nen an inhrilh tawn reng dawn niin a sawi. Home Minister hian Chhinga Veng nula, Bagha-a a tualthih chungchanga Bagha YMA te hnathawh leh an tuamhlawm danah lawmthu a hrilh bawk a, Home Minister hi Kolasib Bawrhsap, Pu R. Zarzosanga, DIG Range, Pu Joseph Lalchhuana, Kolasib SP, Pu Abhishek Dhania leh tlawmngai pawl hruaituten an \awiawm a ni.

Chhinga Veng Local Council, YMA, JAC, MUP leh MHIP te chuan an veng nula, Lalhriatpuii a tualthi chu pawi an tih thu sawiin, a titu chu an dem thu, thuchhuah siamin an sawi a, a mawhphurtu chu man chhuaka, a phu tawka hrem turin thuneitute an ngen a ni. Chhinga Veng Local Council leh pawl hrang hrangte chuan Lalhriatpuii hi nula fel tak, ruih theih thil khawih lo, BA result nghak mek a ni tih sawiin, Dholai-ah hian an in sakna tur bungrua la turin an driver, T. Lalhmingliana nen an kal niin an sawi a, a thih chungchangah hian amah tihminghliau thei tur leh a chhungte rilru tina tur zawnga thu vawrh darh a awm nia sawiin, pawi an tih thu leh thil awm dan hre chiang tura Home Minister, Pu R. Lalzirliana, DIG Range, Pu Joseph Lalchhuana leh Chhinga Veng khawtlang hruaituten Bagha an tlawh chu lawmawm an tih thu an sawi a, Silchar LO, Bagha YMA, Vairengte Police, MHIP, Joint YMA, MZP, Bilkhawthlir Joint YMA leh Kolasib Joint YMA te chungah lawmthu an sawi bawk.