Mizoramah sumdawnna zau zawk kalpui a nih theihna tura buatsaih, Magnetic Mizoram Investors Summit, 2018 chu vawiin khan zawhfel a ni a, Mizoram sorkar leh Company pahnih-in cheng vbch 2,100 hu thawhdunna tur thuthlung an ziak. Mizoram Sorkar-in MoU a ziahpuite chu Sungevity Enterprises nen vbch 600 hu leh Hospitality Doctor nen cheng vabch 1,500 hu niin, he thuthlungah hian Chief Minister, Pu Lal Thanhawla, Sungevity Enterprises Chairman, Pu Premjit leh Hospitality Doctor Managing Director, Pu Deepak Khera-a’n hming an ziak a ni. Thusawiin Chief Minister, Pu Lal Thanhawla chuan Mizorama Investment tihna tura cheng vbch. 2,100 hu MoU ziah tak chu Investor Summit hlawhtlinna lantirtu a nih thu a sawi a, kawng hrang hranga a hlawhtlinna hmuh chhoh zel beisei a nih thu a sawi. Mizoram chuan hmasawnna kawng a zawh mek zel a, hna tak tak thawh tura Company-te ngaihpawimawh ber pakhat inkalpawhna pawh tichangtlung turin nasa taka hmalak mek a nih thu a sawi. Pu Lal Thanhawla chuan, Mizoram chu India leh Asia hmarchhak ramte insumdawn tawnna kawtchhuah ropui ni mai tur a nih avangin investor-te tan kawng a la inhawn zau zel tur thu a sawi bawk. Vawiina Magnetic Mizoram Investors Summit, 2018 kharna inkhawm Berawtlang Tourist Convention Centre-a neihah hian sawmbikten hmasawn zelna tura hmalak dan tur an sawi hova, hemi puala Summit Panel Discussion hi IIM Calcutta-a Prof. C.D. Mitra-a’n a kaihhruai a, Sungevity Enterprise Chairman, Pu Premjit, ICFAI University Vice Chancellor, Lt. Gen Anil Kumar Misra, Airtel (NE) CEO, Pu Raveendra Desai, Hospitality Doctor Managing Director, Pu Deepak Khera, Singapore-a Cloudsteer Technology CEO leh Pu Dhiraj Pratap leh IIM Calcutta Innovation Park CEO, Dr. Subrangshu Sanyal-ten Mizoram an hmuh dan leh an company \heuhin hma an lakzui dan tur an sawi ho a ni.
Magnetic Mizoram Investors Summit, 2018 hi Planning and Programme Implementation Department bultumin Innovations India Advertising & Events Pvt. Ltd.-in a buatsaih a ni a, hemi atana thawkho tur hian Mizoram sorkar leh Innovations India chuan nikum August ni 4 khan thawhhona thuthlung an lo ziak tawh a ni.
