Mamit-a Supana leh a chhungte kut thlak loh nan Police leh YMA hruaitute’n 4th IR Battalion Hqrs-ah dah

0
497
views

Mamit District-a Dapchhuaha awm, Supana tia hriat, Mizo nupui nei leh a chhungte chu khawtlang thinrimin kut an thlak loh nan nizan khan Police leh YMA hruaituten Mamitah an la a, 4th IR Battalion Hqrs.-ah dah rih an ni. Hemi chungchanga Police te leh Sub Hqrs. YMA hruaitute hnen atanga Zonet thu dawn danin, Supana leh a nupui, Hruaii bakah an fate leh chhungte dang mi 18 chu mipui thinrim, nizan dar 9 vela pung khawmin kut an thlak loh nan Mamitah thiar fihlim an ni a, Dapchhuaha an dawr erawh chu kar hawnsakin, bungruate pawnah an paih chhuak a, an motor lian, tipper pawh halsak a ni a, a kan chhiat hmain Police duty-ten an thelh hman a ni. Hemi hma lam hian Supana te chhungkua leh Dapchhuah khaw mi thenkhat inkarah inhriat thiam lohna a awm a, Supana motor tihchhiat a nih chungchangah West Phaileng Police-ten a hmuna kalin thil awm dan an enfiah a, hemi kal zelah hian Supana te chhungkua chu darkar 24 chhunga Dapchhuah chhuahsan tura tih an ni a, hemi hnu, nimin khan Dapchhuah VC, YMA leh tlawmngai pawl dangte nena inbiain, an inrem leh a ni. Amaherawhchu, he inremna hi pawm thei lovin nizan khan Dapchhuah khaw mipui pung khawm chuan Supana dawr leh thil neihte an suasam a, Mamit atanga Police kal leh YMA hruaitute chuan mipui thinrim pungkhawm chu tharum thawh zawng leh thil tichhe zawnga che lo turin an ngen a, Supana-te chhungkua, mi 18 chu an him nan Mamit-ah an la ta a ni. Hemi hnu hian mipui pungkhawm chu thil dang tichhe lovin an tin darh ta nia thu dawn a ni a, pawikhawihna a thlen zui loh nan Mamit SP chuan Police Duty tur a dah zui a ni. Zonet thu dawn danin Supana hi Dapchhuaha rei tak awm tawh, Mizo nupui nei, a fate pawh puitling tawh an ni a, sumdawngin dawr a neih bakah, motor engemawzat a nei bawk a, Dapchhuaha awmte zinga khawsa thei ber ni hiala ngaih a ni.