Pu R. Tlanghmingthanga’n Nalanda Institute of Advanced Studies-a zirlai tirh leh sum hman dan dik lo chungchangah thudik hel tumah sorkar puh

0
488
views

MNF Vigilance Committee Chairman, Pu R. Tlanghmingthanga’n Kolkata-a Nalanda Institute of Advanced Studies-a zirlai 32 tirh an nih dan leh Mizoram Building and Other Consrtuctions Worker Welfare Board sum hman dan dik lo nia sawi chungchang chhui a nih danah Mizoram sorkar chu thudik peh hel tumah a puh a. Hemi chungchang hi vawiin khan Aizawl Press Club-ah thuthar lakhawmtute hrilhin, he thil chhui chiang tura sorkar-in a ruat mi pahnih zinga pakhat zawk chu he Department enkawltu, LE&IT Secretary a nih avangin, mahni Department enkawl chhui tura Secretary ruat a ni chu thu dik hmuh chhuah tumna ni theia an hriat loh thu a sawi. Pu R. Tlanghmingthanga chuan, eng vangin nge zirna in lem, NIAS nen inremna siam a nih tih te, kum 3 zir tur ni si, kum khat atan chauh inremna siam a nih chhan te, Welfare Board sum, cheng nuai 500 chuang hi tu thu-in nge dan kalha hman a nih tih leh zirlaite fee, cheng nuai 128 chuang hi tu thu-in nge ni 43 chhung leka pek tlak a nih tih te chhui tura Enquiry Commission hi beisei a nih laiin, NIAS-a zir tur thlan chungchanga LE&IT Minister hlui, Pu Lalrinmawia Ralte leh MYC Chairman hlui, Pu T. Sangkunga an inrawlh leh rawlh loh an chhui ta daih nia sawiin, mawi leh mawi lo pawh thlu lova an dik lohna thup bo tumna ni ngeia an ngaih thu a sawi. NIAS nena inremna siam chungchangah hian Pu Lalrinmawia Ralte leh Pu T. Sangkunga hi an inrawlh ngei nia sawiin, Pu R. Tlanghmingthanga chuan, zirlaite senso, cheng nuai 128, Welfare Board sum atanga pekna tur thutlukna chu khatih laia LE&IT Minister, Pu Lalrinmawia Ralte hova siam niin a sawi a, he thilah hian Pu Lalrinmawia Ralte leh Pu T. Sangkunga hi a mawhphurtu an nih loh chuan eng vanga an hna atanga bantir nge an nih tih chu an zawhna a nih thu a sawi bawk.

Zawhna chhangin MNF Vigilance Committee Chairman chuan, puh an nihnaah Pu Lalrinmawia Ralte leh Pu T. Sangkunga hi a chhuituten fihlim angin puang mah se, an fihlim lo a ni tih chu an Party ngaihdan a nih thu leh bang tura an phutna pawh a la ding reng niin a sawi. Puan tawh angin, NIAS-a zirlai 32 tirh an nih chungchang leh Mizoram Building and Other Constructions Worker Welfare Board sum hman dan dik lo nia sawi chungchang chhui tur hian Mizoram sorkar chuan kumin April ni 20 khan LE&IT Secretary, Pu Benjamin-a leh IGP, Pu Neeraj Thakur a ruat a. An chhuina report chu May ni 20 hmaa thehlut hman tura tih ni mah se, an zawh hman loh avangin hun pek belh an nih hnuah July ni 4 khan an report hi sorkar-ah an thehlut a ni.