Mizoram Quota-a MBBS leh BDS zir tura thlan zingah Admission ti thei lo an awm lo nia hriat a ni. Higher and Technical Education Department, Technical Wing hotute hnen atanga Zonet thu dawn danin, sorkar laipui puihnaa damdawi lam zirnaa lut turte tan nimin kha Admission tih theih hun hnuhnung ber a ni a, kuminah sorkar laipuiin Mizoram seat chan zat a tihtlem avangin Mizoram Quota-a damdawi lam zir tura thlante seat sem chu tihtlai deuh ni mah se, an zingah Admission ti thei lo an awm lo nia hriat a ni. Technical Wing hotute chuan, Central Pool atanga Mizoramin MBBS-a seat 17 a chan bakah tun hnai khan Dibrugarh leh Kerala-ah seat 1 ve ve hmuh belh leh a nih thu an sawi a. Hemi hnawh khat tur hian National Eligibility & Entrance Test-a an tihthat dan a zirin zirlaite chu koh leh an ni tih an sawi. Central Pool atanga Mizoramin MBBS seat a chan zat 17 bakah tun hnaiah seat 2 dang hmuh belh leh a nih avangin Mizoramin MBBS seat a neih chu 19 a ni ta a, BDS-ah pawh a hmaa seat 3 bakah seat 4 dang hmuh belh leh a nih avangin Central Pool atanga Mizoramin damdawi lam zirnaa seat a neih chu a vaiin seat 26 a ni ta a. Hei bakah hian NEC hnuaiah MBBS seat 12 leh BDS seat 8 hmuh a ni bawk.
