Parl. Secretary 7 ruat an nih chhan chu hna thawh chak duh vang- Pu Lal Thanhawla

0
469
views

CM, Pu Lal Thanhawla’n Parl. Secretary 7 ruat an nih chhan chu hna thawh chak duh vang niin a sawi a, vawiina Congress Bhavan-a inkhawmah he thu hi sawiin, Parl. Secy te hi intih lal tumna avang ni lovin, chak zawka sorkar a kal theihna atana ruat an ni a, Minister-ten puitu tha tak nei se, an Department enkawlte chu hneh takin enkawl se tih duhna avangin anmahni pui turin Parl. Secretary-te hi ruat niin a sawi. CM chuan, state dangah chuan intihlungawi nan Parl. Secretary an ruat thin a, Nagaland-ah phei chuan Minister 12 chauh an awm theih avangin mi dang zawng chu Parl. Secretary-ah an ruat a, hnathawh tur mumal nei lovin an thu mai mai nia sawiin, Mizorama Parl. Secretary ruat dan nen chuan a inang lo hle niin a sawi. Pu Lal Thanhawla chuan, tun hnaia Parl. Secretary 7-in banna an thehluh chu thangthat lak tum nana hmang an awm nia sawiin, an nepzia tilangtu mai niin a sawi a, mahni dinhmun atanga lawm taka ban chu thil harsa tak ni mah se, Parl. Secretary-ten lawm taka banna an thehlut chu lawmawm a tih thu a sawi bawk. CM chuan, tun hmaa Excise Department-in ruihhlo an man sa tihchingpen ching an awm thin thu a sawi chu he Department hnathawkten an ngai hua a, thuthar la khawmtute an hmachhawn hial nia sawiin, sorkar hnathawk reng rengin sorkar phalna lo-a thuthar la khawmtute an hmachhawn phal a ni lova, hemi chungchang hi ziakin Chief Secretary a hriattir tawh tih sawiin, engtinnge a bawhzui dawn tih a hre lo na-in, sorkar phalna lo chuan a hnathawkten Media an hmachhawn thiang lo tih an hriat a ngai a ni, a ti bawk.

Nakkuma Assembly inthlanpui lo awm turah candidate atana Chakma telh lo tura Political Party-te ngen an nih chungchangah MPCC President chuan, Chakma-te chu India khua leh tui an nih avangin an ding dawn tho niin a sawi a. Chakma-te chu Political Party-ten candidate atan hmang lo mah se, an din dawn tho avangin Chakma MLA 2 an awm dawn a, an lal ting ang tih a hlauhawm niin a sawi a, nakin zelah phei chuan sorkar siamna atana tangkai tak an nih palh theih avangin uluk zawka ngaihtuah tul a tih thu a sawi. Pu Lal Thanhawla chuan, fur ruahtui a tlak tam avangin Mizoram hmun hrang hrangah kawngpui a chhe nasa tih sawiin, hei hi MNF sorkar laia Contractor-te hnen atanga zaa 3 an lak nghawng kal zel niin a sawi bawk.

He inkhawm hi MPCC General Secretary Pu R. Liantluanga’n a kaihruai a, Home Minister, Pu R. Lalzirliana, Finance Minister, Pu Lalsawta, Assembly Deputy Speaker Pu R. Lalrinawma leh tun hnaia MPCC General Secretary atana ruat thar MLA pathum – Pu K. Lalrinthanga, Lt. Col. ZS. Zuala leh Pu TT. Zothansanga’n thu an sawi a. Pu Lal Thanhawla hian Congress Party chanchinbu chhuak thar, “Congress Thlifim” tia vuah chu a tlangzarh bawk a ni.