Mizoram De-addiction Co-ordination Forum-in Budget hran dil

0
1153
views

Ruihhlo ngai enkawltu Home hrang hrang intelkhawm, Mizoram De-addiction Co-ordination Forum chuan ruihhlo ngaite enkawlna hmun tihchangtlunna atan sorkar chu Budget-ah a hranpa-a sum dah turin an ngen. Vawiina thuchhuah an siamah Mizoram De-addiction Co-ordination Forum chuan Chawnpuia Tawngtai Bethel Camping Centre sawiselna awm chungchang sawiin he Center hian thil tha tam tak a tih thu te, tihsual palh pawh nei thei a nih thu te an tarlang a, insiam that tuma nasa taka tan an lak laia Centre atanga inla chhuak zinga mi 3 lai tunhnaia OD-a an thi chu pawi an tih thu an sawi bawk. Mizoram De-addiction Co-ordination Forum chuan Mizorama De-addiction Centre hrang hrang awm te chu mi inphal te tanpuina tlingkhawma kal ve tawk tawk an ni tih sawiin hetih laia ruihhlo-in a tihbuai thalaite enkawl leh chhawmdawl kawnga tan la turin mipuite an sawm bawk a ni. Mizoram De-addiction Co-ordination Forum chuan Mizoram chu ruihhlo tawlh rukna kalkawng a awm a nih thu sawiin hemi avang hian tleirawl leh thalaite zingah ruihhlo khawih ching an pung niin an sawi a, a that loh zia an hriat theih nan inhrilhhriatna tam tawk neih tul an tih thu an sawi bawk a ni.