Vawiin-a LADC Hall Lawngtlai-a Lai District Congress Committee General Conference leh Election neih a hmanpui naah he thu hi sawiin, Minister hlui Pu PC Lalthanliana chuan tun hnaia Muster Roll Zirtirtu lak thar result puan vek tawh ennawn leh a nih tur thu MNF Treasurer Pu Vanlalzawma’n a puan laia MNF Gen. Hqrs Office Hnam Run-a kut an beng dur dur chu mak a tih thu a sawi a. Muster Roll Zirtirtu lak thar result chu Department Official leh a changtu Minister-in an approve vek tawh hnuah MNF party mipuite an lungawi lo hle niin a lang a ni a ti a, kut an ben chhan hi eng nge tih a zawhna a nih thu a sawi.
Pu PC Lalthanliana chuan Education Minister Pu Lalchhandama Ralte in Assembly House-ah zirtirtu lak turah Hnam Run list a awm dawn lo tih a sawi laiin, MNF mi leh sate khan Education Minister hi an fak hle a ni, a ti a. Tunah erawh MNF mi leh sa thinura auchhuak an awm vang em ni ennawn leh hi an rawt tak tih leh hei hi em ni Pathian leh kan ram tan titute rorel dan tur chu tih chu MNF Party a zawhna a nih thu a sawi.
